Арманистон ва АҚШ ҳарбийлари қўшма ҳарбий машғулотлар ўтказади. Бу ҳақда Арманистон Мудофаа вазирлиги маълум қилди.

Хабарда келтирилишича, машғулотлар 11-20 сентябр кунлари Арманистон ҳудудида бўлиб ўтиши режалаштирилган.

Машқлар Арманистон Мудофаа вазирлиги тинчликпарвар бригадасининг «Зар» ўқув маркази базасида, халқаро тинчликпарвар миссияларда иштирок этишга тайёргарлик доирасида амалга оширилади.

Маълумотларга кўра, машғулотлар тинчликпарварлик вазифаларини бажаришда «барқарорлаштириш операциялари»ни ўз ичига олади.

«Машғулотлардан мақсад, тинчликпарварлик операциялари доирасида халқаро тинчликпарвар миссияларда иштирок этувчи бўлинмалар ўртасидаги ўзаро ҳамкорлик даражасини ошириш, шунингдек, бошқарув ва тактик алоқада илғор тажриба алмашишдир», дейилади хабарда.

Эслатиб ўтамиз, Арманистон бош вазири Никол Пашинян 2021 йилда Озарбайжон билан чегарадош Сюник вилоятидаги вазият туфайли Путиндан ҳарбий ёрдам сўраган эди. Шунингдек, ўша йили июл ойида бош вазир Россия қўшинларини Арманистон чегарасига жойлаштиришга чақирган.