Аввалроқ Ўзбекистонда тижорат банклари ва тадбиркорлик субъектлари 2023 йилнинг 18 сентябридан бошлаб барча валюта операциялари, жумладан, чет эл валютасини сотиб олишни ҳам асосий ҳисобварақ очилган банк орқали амалга оширилиши мажбурийлиги тўғрисидаги қарор қабул қилингани ҳақида хабар берилган эди. Марказий банкда бугун, 16 сентябр куни ўтказилаётган матбуот анжуманида ушбу қарор бекор қилингани маълум қилинди.

Марказий банк раиси Мамаризо Нурмуротовнинг айтишича, Банк назорати қўмитаси томонидан куни кеча қабул қилинган қарор икки кун давомида кўпгина норозиликларга сабаб бўлган ва бу бўйича бирорта ижобий фикр янграмаган.

«Фалсафада шундай тушунча бор, кўпларингиз билсангиз керак: жамият қабул қилмаган қарор бу нотўғри қарор дегани, у қайси мақсадга йўналтирилган бўлишидан қатъий назар. Биз худди шу тамойилдан келиб чиқиб, кеча кечаси билан ва бугун ўтириб, Банк қўмитасини эрталаб тўплаб, ушбу қарорни бекор қилиш бўйича қарор қабул қилдик», – дейди Марказий банк раиси.

Эслатиб ўтамиз, кеча, 15 сентябр куни «Gazeta.uz» томонидан банк соҳасидаги бир нечта манбаларга таяниб, валюта операцияларини амалга оширишда бир қатор чекловлар жорий этилаётгани ҳақида хабар берилди. Шундан сўнг, мазкур қарор ижтимоий тармоқларда кескин танқидларга учради. Хусусан, кўпчилик иқтисодчилар томонидан бу ўзгариш валюта операцияларини, энг аввало, доллар сотиб олиш жараёнини қийинлаштириши айтиб ўтилди.