АҚШ Давлат котибининг Жанубий ва Марказий Осиё масалалари бўйича ёрдамчиси Доналд Лу расмий ташриф билан Туркманистон, Қозоғистон ва Ўзбекистонга келади. Бу ҳақда АҚШ Давлат департаменти сайтидаги хабарда айтилади.

Қайд этилишича, Доналд Лу 6-11 ноябрь кунлари Туркманистон, Ўзбекистон ва Қозоғистонга сафар қилади. Ташрифдан мақсад «АҚШнинг ҳар бир давлатнинг мустақиллиги, суверенитети ва ҳудудий яхлитлигига содиқлигини» мустаҳкамлашдир, дейилади хабарда.

Хабарда келтирилишича, Туркманистонда давлат котиби ёрдамчиси икки томонлама ва минтақавий масалалар бўйича ҳамкорликни муҳокама қилиш учун юқори мартабали ҳукумат вакиллари билан учрашади. Сўнгра делегация Ўзбекистонга бориб, аёллар ва қизларнинг ҳуқуқларини кенгайтириш ҳамда диний эътиқод ва эътиқод эркинлигини қўллаб-қувватлашни янада ошириш мақсадида ҳукумат расмийлари, фуқаролик жамияти ва маданий гуруҳлар билан учрашади. Қозоғистонда давлат котиби ёрдамчиси Лу иқтисодий ва бизнес раҳбарлари билан учрашиб, Марказий Осиёнинг иқтисодий барқарорлиги ва минтақавий алоқаларни, шунингдек, Қозоғистон келажагини шакллантиришдаги муҳим ролини қўллаб-қувватлаш мақсадида фуқаролик жамияти етакчиларини муҳокама қилади.

«Давлат котиби ёрдамчиси Лу минтақада бўлганида Марказий Осиёда иқтисодий барқарорлик ташаббусини ишга тушириш масаласини муҳокама қилади. Ташаббус орқали Қўшма Штатлар минтақавий савдо йўллари ва салоҳиятини мустаҳкамлаш, малакали ишчи кучини ўқитиш ва тайёрлаш ҳамда Марказий Осиёга халқаро сармояларни жалб қилиш учун 25 миллион доллар маблағ ажратади», – дейилади хабарда.

Делегация таркибига Миллий хавфсизлик кенгашининг Россия ва Марказий Осиё бўйича катта директори Эрик Грин, Мудофаа вазирининг Афғонистон, Покистон ва Марказий Осиё бўйича ёрдамчиси ўринбосари Ребекка Зиммерман, Халқаро тараққиёт агентлигининг Осиё бўйича маъмурияти ёрдамчиси ўринбосари Анжали Каур ва ўринбосари киради.

Аввалроқ Комил Алламжонов АҚШ давлат котиби ёрдамчиси билан учрашгани ҳақида хабар берилганди.