Агарда Украина бўйича музокаралар 2022 йилнинг ноябрида Владимир Зеленский таклиф қилган «тинчлик формуласи» бўйича бошланса, АҚШ буни қўллаб-қувватлайди. Бу ҳақда АҚШ давлат котибининг сиёсий ишлар бўйича ўринбосари Виктория Нуланд маълум қилди.

«Украина тинчликка эришишнинг 10 та банддан иборат режасини тақдим этганди. Россия бу режага ҳеч қанақа муносабат билдирмади. Агар тинчлик музокаралари украиналиклар таклиф қилган адолатли тинчлик формуласи асосида бошланса, албатта, биз буни қўллаб-қувватлаган бўлардик», — дейди дипломат.

Нуланднинг таъкидлашича, АҚШ Россия билан можарога бориш кайфиятида эмас, бироқ у «Украинадан чиқиб кетишини» истайди. Вашингтон Киевни «омон қолиши учун қанча керак бўлса, шунча» қўллаб-қувватлашга ваъда берган. Украинадаги можаро якунланса, Вашингтон ва Москва «ишончли, соғлом савдо алоқаларини қайта тиклаши мумкин».

2022 йил ноябрда Украина президенти Владимир Зеленский G20 давлатлари саммитидаги видеомурожаатида урушни тугатиш учун зарур шартларни эълон қилганди. Индонезиянинг Бали шаҳрида ўтказилган саммит иштирокчиларига йўлланган мурожаатда Зеленский 10 та бандни келтириб ўтган.

Аввалроқ Зеленский ҳукумати Украина ҳарбий йўл билан 1991 йилги чегараларни қайтариб олишига Пентагон шубҳага бораётганидан «дарғазаб бўлганди». Киевнинг таъкидлашича, Америка разведкаси Украина Қуролли Кучларининг имкониятлари борасида олдин ҳам хато қилган. АҚШ Штаб бошлиқлари бирлашган қўмитаси раиси генерал Марк Милли январь охирида шу каби баҳони берганди. У 2023 йилда Украина армиясига 1991 йилги чегараларга қайтиш «ҳарбий йўл билан жуда ва жуда қийин эканини» маълум қилган.