28 июл куни «Ўзбекгидроэнерго» томонидан Тошкент вилояти Бўстонлиқ туманида Пскем дарёсининг чап ирмоғи ҳисобланган Испайсойда янги микро ГЭСнинг очилиши маросими ташкил этилди. Ушбу ҳудуд инфратузилмаси, маҳаллий аҳоли учун зарурий гидроэнергетик қувват манбаи ишга туширилди.

ГЭСнинг расмий очилиш маросимига бағишланган тантанали тадбирда «Ўзбекгидроэнерго» раҳбарияти, пудратчи ва қурилиш ташкилотларининг мутасадди раҳбарлари, «Тошкент ирригация ва қишлоқ хўжалигини механизациялаш муҳандислари институти» миллий тадқиқот университети ҳамда «Ёш бунёдкорлар» халқаро қурилиш жамоаси аъзолари ҳамда ОАВ вакиллари иштирок этди.

Расмий очилиш тадбирига қадар Испайсой микроГЭСда қурилиш ишлари якунлангандан сўнг ГЭСни тармоққа улаш борасидаги амалий ишлар олиб борилди.

Маълумот учун, Испайсой микро ГЭСининг қуввати 200 кВт бўлиб, ўртача йиллик электр энергияси ишлаб чиқариши 1,75 миллион кВт.соатни ташкил этади. Испайсой Тошкент вилоятининг Бўстонлиқ тумани Испай қишлоғидан оқиб ўтувчи Пскем дарёсининг чап қирғоғига қуйилувчи сой бўлиб, сойнинг узунлиги 13 км, ҳажми 73 км²ни ташкил этади. Сойнинг ўртача йиллик сув сарфи 2,4 м³/сек.

Март ойидан суви кўпая бошлайди, энг катта сув сарфи май-июн ойларида кузатилади. Куз-қиш мавсумида суви камаяди.