АҚШнинг амалдаги президенти Жо Байден ўзининг Twitter’даги саҳифасида 2024 йилги сайловларда яна ўз номзодини қўйиш ниятида эканлигини расман маълум қилди.

«Ҳар бир авлодда демократияни ҳимоя қилиш керак бўлган пайтлар бўлади. Асосий эркинликларингизни ҳимоя қилинг. Ишонаманки, бу бизнинг онларимиз. Шунинг учун ҳам мен Америка Қўшма Штатлари Президенти лавозимига қайта сайланиш учун ўз номзодимни қўйяпман. Бизга қўшилинг. Келинг, ишни якунлаймиз», — деб ёзди у.

Байденнинг мурожаати рамзий маънода 25 апрелда эълон қилинди, худди шу санада сиёсатчи ўз номзодини 2019 йилдаги сайловда президентликка номзодини эълон қилган эди.

Шунингдек, АҚШ вице-президенти Камала Харрис ҳам 2024 йилги сайловларда Жо Байден билан биргаликда яна иштирок этишини айтди.

Маълумот учун, Жо Байден Қўшма Штатларнинг 46-президенти бўлиб, 2021 йил январидан бери ушбу лавозимда фаолият олиб бормоқда. 2009–2017 йилларда у Барак Обама маъмуриятида АҚШ вице-президенти лавозимида ишлаган. Бунгача у Делавэр штатидан сенатор бўлган.