Россия ташқи ишлар вазири Сергей Лавров Европа Иттифоқи ушбу мамлакатни Марказий Осиё ва Жанубий Кавказдан сиқиб чиқариш бўйича режаларини яширмаётганини айтди. У россиялик журналист Павел Зарубин билан суҳбатда Россия «бу минтақада аввалдан бўлгани ва ҳеч ерга йўқолмаслигини» даъво қилган.

«Европа Иттифоқи бизни ҳар томонлама жиловлаш, Марказий Осиё ва Кавказдан сиқиб чиқариш ниятларини яширмаяпти. Бу иш бермайди. Биз тарихан шу ердамиз ва ҳеч қаерда йўқолиб кетмаймиз. Бизнинг шерикларимиз, иттифоқчиларимиз буни жуда яхши билишади», – дейди у.

Лавров, шунингдек, Эммануэл Макроннинг Қозоғистонга ташрифидан олдин Ғарб матбуотида чиққан «Франция президенти Путиннинг томорқасига ташриф буюргани» қабилидаги хабарларга муносабат билдириб, «Ғарб дунёси етакчилари ўзларига жуда бемаъни баёнотларни чиқаришга имкон бераётганларини» таъкидлаган.

«Франция президенти Макрон Қозоғистонга ташрифи чоғида бу мамлакат ҳеч қачон ҳеч кимнинг вассали бўлмаслигидан хурсанд эканлигини очиқчасига айтди. Бу дипломатик тил учун ҳам бемаъниликдир», – дейди Россия ташқи ишлар вазири.

Эслатиб ўтамиз, ноябрь ойининг бошида Франция президенти Эммануэл Макрон икки кунлик ташриф билан Қозоғистон ва Ўзбекистонда бўлди. Дунё матбуотида унинг Марказий Осиёга келиши Россия-Украина уруши фонида ушбу мамлакатнинг энергетика тизимини диверсификация қилишга уриниши мақсадида амалга ошаётгани айтилди. Дарҳақиқат, Макрон ташрифи давомида икки давлат билан ҳам уран етказиб бериш бўйича келишувларга эришди. Жумладан, Франциянинг Orano компанияси Навоий вилоятида уран қазиб олиш учун 500 миллион доллар сармоя киритиш бўйича Ўзбекистон биан шартнома имзолади.

Франция президенти Қозоғистонга сафари давомида ўзининг X (собиқ Twitter) саҳифасида қозоқ тилида пост қолдириб, унда «суперкучлар яна ҳукмронликка интилаётган ва баъзилари олдиндан айтиб бўлмайдиган ҳаракатларни содир этишга уриниши мумкин бўлган дунёда» янги истиқболларни биргаликда қура оладиган шериклар ва дўстларга ишониш муҳимлиги, Франция ва Қозоғистон ҳам уларнинг қаторига киришини таъкидлади. Макрон Ўзбекистон раҳбари билан ҳам ўзаро стратегик алоқаларни ривожлантириш бўйича келишиб олди.

Унинг ташрифидан бир неча кун ўтиб, Қозоғистонга Россия президенти Путин борди ва мамлакат раҳбари Қосим-Жўмарт Тўқаев билан учрашди. Шунингдек, Италия президенти 9-11 ноябр кунлари Ўзбекистонда бўлди. Қирғизистон президенти Садир Жапаров эса худди шу вақтда расмий ташриф билан Парижга бориб, Эммануэл Макрон билан учрашди.