Хоразм вилояти Мактабгача ва мактаб таълими бошқармаси матбуот хизмати мактаб ўқитувчиси 2 нафар 6-синф ўқувчиларини дарс хонасида калтаклагани бўйича расмий муносабат билдирди.

Маълум қилинишича, 2024 йил 24 май куни ижтимоий тармоқларда «Хоразмда мактаб ўқитувчиси 2 нафар ўқувчини дарс хонасида калтаклади» сарлавҳаси остида видеолавҳа тарқатилган. Ҳолат вилоят Мактабгача ва мактаб таълими бошқармаси ишчи гуруҳи томонидан ўрганилди.

Ўрганиш давомида воқеа жорий йилнинг 23 май куни Тупроққалъа туманидаги 6-сонли умумий ўрта таълим мактабида 6-синф ўқувчиларига география фани дарс машғулоти ўтказилаётган пайтда содир бўлганлиги аниқланган.

Ўқитувчи мазкур синфнинг 2 нафар ўқувчисига ўзаро гаплашиб ўтиришгани учун танбеҳ бериб, уларга нисбатан қўпол муносабатда бўлган. Воқеадан кейин ўқитувчи ўз хоҳишига кўра ариза ёзганлигини ва ишдан бўшатилганлигини маълум қилинди.