Туркиянинг «пери мўрилари» номли қоялари билан машҳур, сеҳрли ўлка дея таъриф берилган ҳудуди Каппадокия турли шакл ва ўлчамдаги ҳаво шарлари фестивалига мезбонлик қилди. Англия, Швецария, АҚШ, Германия, Франция, Белгия, Испания, Португалия, Словения, Македония, Люксембург ва Туркиядан 22 хил фигурали шарлар намойиш парвозларини амалга оширди. «Музқаймоқ», «Ўрдак», «Обеликс», «Саккизоёқ», «Фазо кемаси» ва «Турк байроғи» каби санъатшунослар томонидан махсус шакл ва тус бериган турли кўринишдаги ҳаво шарлари маҳаллий ва хорижий сайёҳларда катта қизиқиш уйғотди.

«Каппадокия ҳаво шарлари ва Маданият йўли фестивали» доирасида ўтказилган халқаро тадбирда эрта тонгдан бошланган тайёргарликлар ортидан шарлар бирин-кетин осмонга кўтарилди. Тажрибали учувчилар Каппадокия осмонида фестивал учун турли ранг ва намуналарда яратилган такрорланмас ҳаво шарларини маҳорат билан бошқарган бўлса, дунёда ягона бўлган «пери мўрилари»нинг мистик манзараларида шарларнинг рақси томошабинларни ҳайратга солди.

Туркия «Маданият йўли» фестиваллари бу йил 11 шаҳарда намойиш этилади

Туркия Маданият ва туризм вазирлиги томонидан 2021 йилдан бери уюштирилиб келинаётган Туркия Маданият йўналиши фестиваллари 5 август куни Каппадокияда бошланди. Дунёнинг энг қамровли маданият ва санъат лойиҳаларидан бири сифатида ташкил этилган Турк маданияти йўли фестиваллари бу йил 11 вилоятда ўтказилади. 5-13 август кунлари ўтказиладиган «Каппадокия ҳаво шари ва Маданият йўли» фестивали ортидан Туркиянинг Трабзон, Эрзурум, Чанаккале, Газиантеп, Анқара, Коня, Истанбул, Диярбакир, Измир ва Анталия вилоятларида фестиваллар навбат билан бўлиб ўтади.

Туркия Маданият йўли фестиваллари дастури:

• Каппадокия ҳаво шари ва Маданият йўналиши фестивали — Невшеҳир, 2023 йил 5-13 август;
• Сумела Маданият йўналиши фестивали — Трабзон, 2023 йил 19-27 август;
• Паландўкен Маданият йўналиши фестивали — Эрзурум, 2023 йил 19-27 август;
• Троя Маданият йўналиши фестивали — Чанаккале, 9-17 сентябр 2023 йил;
• Гастроантеп Маданият йўналиши фестивали — Газиантеп, 2023 йил 16-24 сентябр;
• Башкент Маданият йўналиши фестивали — Анқара, 16 сентябр – 1 октябр 2023 йил;
• Коня тасаввуфий мусиқа фестивали — Коня, 2023 йил 23-30 сентябр;
• Беёғлу Маданият йўналиши фестивали — Истанбул, 30 сентябр – 15 октябр 2023 йил;
• Сур Маданият йўналиши фестивали — Диярбакир, 2023 йил 14-22 октябр;
• Эфес Маданият йўналиши фестивали — Измир, 2023 йил 28 октябр – 5 ноябр;
• Анталия Маданият йўналиши фестивали — Анталия, 2023 йил 4-12 ноябр.