Бухоро вилоятидаги кучли чанг бўрони Бухоро аэропорти фаолиятини чекланишига сабаб бўлди. Оқибатда иккита Самарқанд ва Навоийдаги аэродромларга йўналтирилди, деб хабар берди Uzbekistan airports.

Маълум қилинишича, Turkish airlines авиакомпаниясининг Истанбул-Бухоро йўналишида TK-266 рейсини амалга ошираётган самолёт чанг бўрони туфайли белгиланган аэропортга қўна олмаган. Экипаж Самарқанддаги муқобил аэродромга учишга қарор қилган. Маҳаллий вақт билан соат 15:20 да бортида 62 та йўловчи бўлган самолёт Самарқанд аэропортига қўнган.

Uzbekistan airways авиакомпаниясининг Тошкент-Бухоро йўналиши бўйича HY-23 рейсини амалга ошираётган самолёт Навоийдаги муқобил аэродромга йўл олди. Тошкент вақти билан соат 15:25 да бортида 139 нафар йўловчи бўлган самолёт Навоий аэропортига қўнган.

Эслатиб ўтамиз, аввалроқ Фарғона водийсидаги ноқулай об-ҳаво шароити – қалин туман туфайли Наманган ва Фарғона аэропортларида рейсларни қабул қилиш ва жўнатиш вақтинча чекланганди.