Самарқанд шаҳри 25-30 декабр кунлари мезбонлик қилган шахматнинг рапид ва блиц йўналишлари бўйича жаҳон чемпионати якунланди. Ҳар икки йўналиш бўйича рақибларидан кўпроқ очко тўплаган дунёнинг биринчи рақамли шахматчиси, норвегиялик Магнус Карлсен чемпионликни қўлга киритди.

Магнус Карлсен Рапид турнирида 13 та имкониятдан еттита ғалаба ва олтита дуранг қайд этган ҳолда 202 нафар ўйинчилар орасида биринчи бўлди. Ундан кейинги ўринларни мос равишда Владимир Федосеев (Словения) ҳамда Ю Янгйи (Хитой) эгаллади.

Ўзбекистонлик рапид бўйича собиқ жаҳон чемпиони Нодирбек Абдусатторов турнирни 11-ўринда якунлади. Абдусатторов турнир давомида Магнус Карлсен билан ҳам ўйин ўтказиб, ўзаро дурранг қайд этди.

Бундан ташқари, Ўзбекистон шарафини ҳимоя қилган Жаҳонгир Воҳидов 30-ўрин, Жавоҳир Синдаров 39-ўрин, Шамсиддин Воҳидов 41-ўрин билан турнирни якунлади.

Блиц йўналишида Магнус Карлсен 1-ўрин, Даниил Дубов 2-ўрин ҳамда Владислав Артемиев 3-ўринни олди. Бу йўналишда энг яхши натижани қайд этган ўзбекистонлик Шамсиддин Воҳидов 29-ўринга лойиқ кўрилди.

Қизлар бўйича рапид ва блиц йўналишидаги жаҳон чемпионатида Умида Омонова, Афруза Ҳамдамова ҳамда Нодира Нодиржонова Ўзбекистон шарафини ҳимоя қилди.

Қайд этиш керак, умумий соврин жамғармаси 1 миллион АҚШ долларини ташкил этадиган мазкур чемпионатда Магнус Карлсен ҳар икки йўналиш бўйича ғалаба қозониб, 120 минг долларга эга чиқди. 11-ўринни эгаллаган Нодирбек Абдусатторов 5 минг долларини қўлга киритди.