Бугун, 26 октябр куни Президент Шавкат Мирзиёев ташриф билан Ўзбекистонда бўлиб турган Қозоғистон Республикаси парламенти Мажлис Раиси Ерлан Кошановни қабул қилди. Бу ҳақда Президент матбуот хизмати хабар берди.

Унда икки томонлама муносабатларнинг долзарб масалалари кўриб чиқилган. Ўзбекистон билан Қозоғистон ўртасидаги стратегик шериклик ва иттифоқчилик муносабатлари изчил мустаҳкамланиб бораётгани қайд этилган.

Шунингдек, ўзаро товар айирбошлаш кўрсаткичлари ва қўшма корхоналар сони барқарор ўсиб бораётгани, автомобилсозлик, тўқимачилик, электротехника, логистика ва бошқа тармоқларда кооперация лойиҳалари амалга оширилаётганлиги ҳақида айтиб ўтилган.

Олий даражадаги келишувларни сўзсиз бажариш, ҳудудлар ўртасидаги ҳамкорликни ва маданий-гуманитар алмашинувни кенгайтириш мақсадида яқин парламентлараро алоқаларни янада ривожлантиришга алоҳида эътибор қаратилган.

Бундан ташқари, қонун ижодкорлиги фаолияти соҳасида, ўз-ўзини бошқариш органларини ривожлантириш ва ёшларни қўллаб-қувватлаш борасида тажриба алмашиш, шу жумладан ёш депутатлар делегацияларининг ташрифларини ташкил этиш ҳамкорликнинг муҳим йўналиши сифатида белгилаб олинган.

Эслатиб ўтамиз, аввалроқ Шавкат Мирзиёев Қозоғистонга бориши ва Астана шаҳрида бўлиб ўтадиган Туркий давлатлар ташкилоти саммитида иштирок этиши айтилганди.