Навоий вилоятида беҳаё сайтга кирган 405 нафар шахс 142 миллион сўмга чув тушган. Айтилишича, сохта иловага кирган фуқароларга сайт экранида Ўзбекистон Республикаси ИИВ Кибержиноятларга қарши курашиш бўлимидан билдиришнома кўринган ва у гумонланувчи шахс томонидан қуйидагича мазмунда ёзилган.

«Сиз Ўзбекистон Республикаси Қонунчилиги билан тақиқланган материаллар яъни педофилия, зўравонликни тарғиб қилиш элементларига эга бўлган порнография материаллари мавжуд бўлган сайтларга ташриф буюрганингиз учун блокировка қилиндингиз. Блокировкани олиш учун сиз ушбу давлат картасига 350 минг сўм миқдорида жарима тўлашингиз лозим» дея ёзилган хабарномада.

Оқибатда, фуқаролар давлат картаси дея таъкидланган бегона шахснинг картасига пул ўтказиб беришга мажбур бўлишган. Гумондор эса сохта иловага танишининг карта рақамини киритган ва карталарга катта миқдорда пул маблағлари тушавергач, уни яна бошқа карта рақами билан алмаштирган. Буларнинг барчасини у ҳеч кимда шубҳа уйғотмаслик учун қилган. Умумий беш кун ичида карталарга 142 млн сўм миқдорида пул келиб тушган.

Ҳозирда 31 ёшли гумондор ушланиб, ҳолат юзасидан суриштирув ишлари олиб борилмоқда.

Эслатиб ўтамиз, Бухорода талаба 35 ёшли аёлдан беҳаё суратларини тарқатмаслик эвазига пул талаб қилганди.