Озарбайжон Президенти Илҳом Алиев Тожикистон етакчиси Эмомали Раҳмоннинг таклифига биноан, Марказий Осиё давлат раҳбарларининг бешинчи Маслаҳатлашув учрашувида фахрий меҳмон сифатида иштирок этиш учун Тожикистон пойтахти Душанбе шаҳрига етиб келди. Бу ҳақда «Azernews» нашри хабар берди.

Маълум қилинишича, Душанбе халқаро аэропортида олий даражали меҳмонни кутиб олиш учун фахрий гвардия саф тортган. Озарбайжон етакчисини аэропортда Тожикистон Бош вазири Қоҳир Расулзода кутиб олган.

Илҳом Алиев Марказий Осиё давлатлари йиғилишида иштирок этиши ва давлат раҳбарлари билан тор доирадаги учрашувлар ташкил этиши режалаштирилган.

Шу тариқа, Алиев Марказий Осиё давлат раҳбарларининг маслаҳатлашув учрашувида минтақадан ташқаридаги давлатдан қатнашаётган биринчи президентга айланди.

Маълумот ўрнида, Душанбеда Оролни қутқариш халқаро жамғармаси таъсисчи давлатлари раҳбарларининг йиғилиши ҳам бўлиб ўтади. Президент Шавкат Мирзиёев ҳам унда қатнашиш учун Тожикистонга жўнаб кетди.