Ўзбекистонда қурилиш-таъмирлаш ишлари учун бюджетдан ажратилаётган маблағлар қарийб 33 триллион сўмга етган ёки 2016 йилга нисбатан 5 бараварга ошган. Бу ҳақда бош прокурор кун тартибидаги масалалар юзасидан қилган маърузасида айтди.

Қайд этилишича, сўнгги 7 йилда 300 минг хонадонли 9 мингдан ортиқ кўп қаватли уйлар, 22 мингга яқин сервис — хизмат кўрсатиш, 12 мингта ижтимоий соҳа, 32 мингта бошқа объектлар янгидан қурилган, реконструкция қилинган.

Йиғилишда Президент томонидан қурилишда бюджет маблағлари талон-торож қилинишининг олдини олишни янги тизими белгилаб берилганлиги таъкидланди. Шу боис, бюджет маблағларидан оқилона фойдаланиш устидан назорат тизимини жорий қилиш механизмлари белгилаб олинди.

Бунинг учун:

• бош режаларни ишлаб чиқиш харажатларини тартибга солувчи ҳужжатни янгилаш ва бугунги замон талабларига мослаштириш;
• бош режаларга риоя этилиши бўйича назоратни жонлантириш, фаолият самарадорлигини ошириш;
• «Қурилиш ресурслари миллий классификатори» электрон платформасини тўлиқ ишга тушириш;
• Халқаро молия институтлари маблағи ҳисобидан қуриладиган объектларнинг лойиҳа ҳужжатларини Комплекс экспертизадан ўтказиш;
• Қурилиш вазирлиги ҳузурида ташкил этилаётган «Лойиҳа офиси» фаолиятини тўлиқ йўлга қўйиш;
• Техник назоратчиларни малака оширишини сифат жиҳатдан янги босқичга кўтариш ва натижадорликни ошириш лозимлиги билдирилган.

«Йиғилиш якунига кўра, қурилиш масалаларига алоқадор вазирлик ва идораларда бюджет маблағларидан самарали фойдаланиш ҳамда янги назорат механизмларини жорий этиш бўйича йўл хариталарини ишлаб чиқиш ва бошқа зарур чора-тадбирлар бегилаб олинди», — дейилади хабарда.

Маълумот учун, 2023 йилда 149,9 триллион сўмлик қурилиш амалга оширилган бўлиб, кўрсаткич 2022 йилга (130,8) нисбатан салкам 20 триллион сўмга кўп. Аввалроқ Тошкентда бир йилда қурилиш ишларига 32,2 триллион сўмлик маблағ сарфлангани бўйича маълумот берилганди.