Тошкент шаҳрида 2023 йилнинг 2 март, жума куни Ўзбекистон ва Қозоғистон авиация маъмуриятлари ўртасида музокаралар бўлиб ўтди. Бу ҳақда Транспорт вазирлиги матбуот хизмати хабар берди.

Ўзбекистон транспорт вазири ўринбосари Жасурбек Чориев ҳамда Қозоғистон Фуқаро авиацияси қўмитаси раиси Талгат Ластаев раҳбарлигида бўлиб ўтган музокараларда фуқаро авиацияси соҳасидаги ҳамкорликни ривожлантириш, келишилган йўналишларда мунтазам авиақатновлар сонини кўпайтириш билан боғлиқ масалалар кўриб чиқилди.

Музокаралар натижасига кўра, томонлар фуқаро авиацияси соҳасида икки томонлама ҳамкорликни кенгайтириш бўйича қуйидаги келишувларга эришди:

• Остона—Тошкент—Остона ҳамда Олмаота—Тошкент—Олмаота йўналишларида мунтазам авиақатновлар сонини ошириш;
• Ўзбекистон авиакомпаниялари мунтазам йўловчи қатновлари учун Қозоғистон ҳудудида қўшимча 5 та шаҳар (Қарағанда, Уст-Каменогорск, Павлодар, Кокештау, Тараз) белгилаш;
• Қозоғистон авиакомпаниялари мунтазам йўловчи қатновлари учун Ўзбекистон ҳудудида қўшимча 6 та шаҳар (Қарши, Фарғона, Бухора, Андижон, Навоий, Термиз) белгилаш.

Аввалроқ Хитойнинг China Southern Airlines авиакомпанияси Пекин ва Тошкент ўртасида тўғридан-тўғри мунтазам қатновларни тиклаётгани ҳақида хабар берилганди. Шунингдек, Туркиянинг Turkish Airlines авиакомпанияси Истанбулдан Бухорога мунтазам авиарейслар йўлга қўйиши, Озарбайжондан Самарқандга авиақатновлар йўлга қўйиши ҳақида маълум қилинганди.