Қуролли Кучлари академияси «Ҳарбий-касбий тайёргарлик» йўналиши бўйича VIII халқаро олимпиадада 1-ўринни эгаллади. Бу ҳақда Мудофаа вазирлиги матбуот хизмати хабар берди.

Маълум қилинишича, Қуролли Кучлари академияси ўқув жараёнини таъминлаш базасида МДҲга аъзо давлатлар олий ҳарбий таълим муассасалари курсантлари ўртасида ўтказилган «Ҳарбий-касбий тайёргарлик» йўналиши бўйича VIII халқаро олимпиада якунланди.

Бир неча кун давомида Хитой Халқ Республикаси, Россия Федерацияси, Қозоғистон, Тожикистон, Қирғизистон ва Ўзбекистон Республикаларидан 6 жамоа шиддатли баҳслар олиб борди. Хусусан, олимпиада иштирокчилари «Тиббий тайёргарлик» «Ўқувда қийин – жангда осон», «Кимёвий ҳимоя», «Ориентирлаш», «Халқаро гуманитар ҳуқуқ», «Қуролсоз», «Дуэль», «Мерган», «Армия биатлони», «Йўлак» каби мусобақаларда ўз билим ва маҳоратларини синовдан ўтказган.

Якуний натижаларга кўра, умумжамоа ҳисобида ўринлар қуйидагича тақсимланди:

• I ўрин — Ўзбекистон Республикаси Чирчиқ олий танк қўмондонлик-муҳандислик билим юрти жамоаси;
• II ўрин — Хитой Халқ Республикаси Қуруқликдаги қўшинлар махсус тайинланган ҳарбий академияси жамоаси;
• III ўрин — Россия Федерацияси Москва олий умумқўшин қўмондонлик ҳарбий билим юрти жамоаси.

2024 йил 24 май куни олимпиаданинг ёпилиш маросими бўлиб ўтган. Ушбу халқаро мусобақанинг ўтган йилги баҳсларида Ўзбекистон Республикаси Қуролли Кучлари академияси курсантлари 1-ўринни эгаллаган эди.