Володимир Зеленский Вагнер раҳбари Евгений Пригожин Кремл буйруғи билан ўлдирилганини иддао қилди. Президентнинг айтишича, Украина томонида етарлича маълумотлар мавжуд.

«Путин одам сифатида ҳам, сиёсатчи сифатида ҳам ҳайратда қолди. У Пригожинни ўлдирди. Бизда бу ҳақда етарлича маълумотлар бор», — дея Зеленскийнинг Киевдаги Ялта саммити чоғида қилган баёнотидан иқтибос келтиради BBC’нинг Рус хизмати.

Зеленский Путиннинг Пригожин ўлимига алоқадор бўлиши мумкинлиги ҳақидаги хулосага аниқлик киритмаган.

Аввалроқ, Украина президенти Евгений Пригожиннинг самолёти ҳалокати юзасидан ўз муносабатини билдирган эди.

«Бизнинг бунга ҳеч қандай алоқамиз йўқ. Ҳамма тушунади, кимнинг алоқаси борлигига», — деганди Украина президенти Вагнер асосчисининг вафотидан кейин.

Россия Президенти матбуот котиби Дмитрий Песков Вагнер раҳбари Кремл буйруғи билан ўлдирилган деган тахминни «мутлақ ёлғон» деб атаган.