Самарқанд шаҳрида 49 киши умумий овқатланиш марказида тайёрланган «ҳот-дог»дан заҳарланди. Жабрланганлар юқумли касалликлар шифохонасига ётқизилган ва улар орасида вояга етмаган болалар ҳам бор.

Касалланганларнинг барчаси Самарқанд шаҳри Рудакий кўчасида жойлашган fast-food тайёрлаш марказида «ҳот-дог» истеъмол қилган. Кечга яқин уларда овқатдан заҳарланиш аломатлари пайдо бўлиб, иситма, ич кетиши, қайт қилиш ҳолатлари кузатилган.

Ҳозирда беморлардан 29 нафарининг аҳволи яхшиланиб, уйларига кетишга рухсат берилган. Қолган 20 нафар бемор шифокорлар назоратида бўлиб, уларнинг аҳволи ҳам яхшиланмоқда.

Ҳозирги вақтда умумий овқатланиш маркази фаолияти тўхтатилиб,«ҳот-дог» учун ишлатилган маҳсулот намуналари вилоят санитария-эпидемиологик осойишталик ва жамоат саломатлиги бошқармасига юборилган.

Аввалроқ, 4 август куни Самарқанд вилояти Ургут туманида ҳам 42 нафар фуқаро овқатдан заҳарланиб, касалхонага ётқизилганди. Ҳолат тўй тадбирида кузатилган ҳамда беморларга «Ўткир овқат токсикоинфекцияси» ташхиси қўйилган.

Шунингдек, 2022 йилнинг биринчи ярим йиллигида 36 ҳолатда овқатдан заҳарланиш ҳолати қайд этилиб, жами 176 нафар шахс жабрланган ва уларнинг 52 нафари болалар.