Шу йилнинг 1 ноябр куни Халқ депутатлари Самарқанд вилояти Кенгаши томонидан вилоятда ичимлик суви таъминоти ва оқова сув хизматлари учун янги тарифлар (нархлар) тасдиқланди.  Бу ҳақда «Ўзсувтаъминот» АЖ хабар берди.

Маълумот учун, ўтган беш йилда Самарқанд вилоятида марказлашган ичимлик суви билан таъминланиш даражаси 54,6 фоиздан 73,1 фоизга, канализация қамрови 9,8 фоиздан 18,7 фоизга етказилган. Келгуси беш йилда эса вилоятда аҳолини марказлашган ичимлик суви билан таъминланиш даражаси 73,1 фоиздан 92,5 фоизга, канализация хизмати қамрови 18,7 фоиздан 45,1 фоизга етказилиши режалаштирилган. Бунинг учун 2,3540 триллион сўм эвазига, 4361,20 минг километр ичимлик суви ва 472,9 километр канализация тармоғи, шунингдек, 432 та сув ва 45 та канализация иншоотлари барпо этилиши белгиланган.

Бундан ташқари иш ҳақи, электр-энергия, солиқ тўловлари, хорижий кредитлар тўлови амалга оширилган бўлиб, жорий ва капитал таъмирлаш, тизимни модернизация қилиш ишларида ҳам сарф-харажатлар талаб этилиши айтилган. Шу сабабли қуйидагича нархлар белгиланган.

Ичимлик суви:

а) аҳоли учун – 1м3 – 2 500 сўм;
б) бюджет ташкилотлари учун – 1м3 – 5 700 сўм; (ҚҚСсиз)
в) улгуржи истеъмолчилар учун – 1м3 – 5 700 сўм; (ҚҚСсиз)

Оқова суви хизмати:

а) аҳоли учун – 1м3 – 1600 сўм;
б) бюджет ташкилотлари учун – 1м3 – 4300 сўм; (ҚҚСсиз)
в) улгуржи истеъмолчилар учун – 1м3 – 4 300 сўм; (ҚҚСсиз).

Эслатиб ўтамиз, ушбу янгиланган нархлар вилоятда 2023 йил 16 ноябрдан бошлаб жорий қилиниши белгиланган.

Аввалроқ, Президент Мирзиёев вилоят ҳокимларига ичимлик сувини арзонлаштириш вазифасини қўйганди. Шунингдек, ичимлик суви таъминоти оғир бўлган 813 та маҳалла ичимлик суви билан таъминланиши ҳақда хабар берилганди. Бундан ташқари, Тошкентда ичимлик ва оқова суви нархи салкам 4 бараварга ошиши мумкинлиги айтилганди.