Самарқанд халқаро технология университети 2023 йилнинг 22–24 феврал кунлари Тошкент шаҳрида «Олий таълимда сифатли бошқарув маданиятини узлуксиз ривожлантиришни таъминлаш бўйича лойиҳаларни ишлаб чиқиш»га қаратилган Change Akademy 3 дастурининг якуний босқичида фаол иштирок этиб, республикадаги ўттиздан ортиқ нуфузли ОТМлар орасида энг яхши жамоа (Winner of best team) деб топилди. Бу ҳақда университет матбуот хизмати хабар берди.

Маълум қилинишча, лойиҳа якунида СХТУ жамоаси Advance-HE ташкилотининг кейинги анжуманига 1 кишилик йўлланмага, ҳамкорлик грантида 2 нафар иштирокчи қатнашишига муваффақ бўлди ҳамда Британия кенгаши томонидан китоблар билан тақдирланган.

Хабарга кўра, СХТУ жамоасининг лойиҳаси «Талабаларда танқидий фикрлаш кўникмаларини ривожлантириш» мавзусида бўлиб, у талабаларнинг бутун академик фаолияти давомида, яъни индивидуал топшириқларни бажаришдан тортиб то халқаро стандартларга мос келадиган кенг қамровли лойиҳаларни яратишгача бўлган жараёнда фойдаланиш учун мўлжалланган. Шунингдек, СХТУ жамоасининг вазифаси бир қатор белгиланган машқларни бажариш орқали талабаларнинг аналитик муаммоларни ечиш қобилиятини ривожлантиришга қаратилган бўлиб, у университетнинг биринчи курс талабаларининг танқидий фикрлаш қобилятини юксалтиришга йўналтирилди. Бунда биринчи курс талабаларидан жамоа тарзда бизнес ёки муҳандислик йўналишидаги мураккаб топшириқларни бажариш талаб этилди.

Маълумот учун, Change Akademy 3 дастури Олий таълим, фан ва инновациялар вазирлиги, Британия кенгаши (British Council) ва Advance-HE ташкилоти ҳамкорлигида ишлаб чиқилган.