Telegram асосчиси Павел Дуров 7 март куни ўзининг мессенжердаги каналида Украина воқеаларига муносабат билдирди.

Қайд этилишича, Дуров онаси томондан Украинага алоқадор ҳисобланади. Ижтимоий тармоқ асосчиси айнан шунинг учун мазкур мамлакатдаги воқеалар унинг шахсий ҳаётига ҳам алоқадорлигини, Киевда унинг қариндошлари борлигини таъкидлаган.

Постни тўлиқ шаклда қуйида ўқишингиз мумкин:

Агар сиз менинг постларимни кузатиб борсангиз, мен онам томондан Киевга алоқадор эканлигимни биласиз. Онамнинг қизлик фамилияси украинча (Иваненко) ва шу кунгача Украинада кўплаб қариндошларимиз яшайди. Шунинг учун бу фожиали можаро мен учун ҳам, Telegram учун ҳам шахсий масаладир.

Баъзилар Telegram украиналиклар учун унчалик хавфсиз эмаслигини таъкидлашади, чунки мен бир вақтлар Россияда яшаганман. Бу одамларга Россиядаги фаолиятим қандай якунланганини айтиб бераман.

Тўққиз йил олдин мен Россия ва Украинадаги энг йирик ижтимоий тармоқ бўлган VK компаниясининг бош директори эдим. 2013 йилда Россия хавфсизлик агентлиги — ФХХ мендан россияпараст президентга (бу вақтда Украинани Виктор Янукович бошқарган — таҳририят) норозилик билдирган украиналик VK фойдаланувчиларининг шахсий маълумотларини тақдим этишимни талаб қилди.

Мен бу талабларни бажаришдан бош тортдим, чунки бу украиналик фойдаланувчиларга хиёнат қилиш дегани эди. Шундан сўнг мен ўзим асос солган компаниядан бўшатилдим ва Россияни тарк этишга мажбур бўлдим.

Мен компаниямни ва уйимни йўқотдим, лекин ҳозир яна шундай танлов қилишим керак бўлиб қолса, буни яна бир бор иккиланмасдан такрорлайман. 2014 йил апрель ойида ФХХнинг сканерланган буюртмаларини ва уларга менинг жавобим сифатида жўнатилган капушонли ит тасвири мавжуд VK‘даги постимни ўқиганимда ғурур билан табассум қиламан.

Бу талабларни рад қилганимда, шахсан мен учун катта хавф бор эди. Мен ҳали ҳам Россияда яшардим ва жамоам ва эски компаниям ҳам ўша мамлакатда жойлашган эди.

Орадан кўп йиллар ўтди. Кўп нарса ўзгарди: мен энди Россияда яшамайман, у ерда ҳеч қандай компания ёки ходимлар йўқ. Лекин бир нарса ўзгармади — мен нима бўлишидан қатъий назар фойдаланувчиларимизни ҳимоя қиламан. Уларнинг шахсий дахлсизлик ҳуқуқи муқаддасдир. Айниқса ҳозир ҳар қачонгидан ҳам кўпроқ», — деб ёзган Дуров.

Аввалроқ Telegram асосчиси нима учун Россияда фаолият олиб бормаётганини айтганди. Шунингдек, Дуров Telegram нима учун коронавирус ҳақидаги сохта хабарларни блокламаслигини маълум қилган.