Тошкентда аёл 12 ёшли ўғли билан заргарлик дўконига бориб, 49 млн сўмлик тилла буюмларни ўғирлаб кетди. Бу ҳақда Миллий гвардия матбуот хизмати хабар берди.

Қайд этилишича, фуқаро ўзи сотувчи бўлиб ишлайдиган Эски жўва бозорида жойлашган заргарлик дўконига жорий йилнинг 28 апрел куни номаълум аёл ўсмир бола билан келганини айтиб, ИИО га ариза берган. Унга кўра, аёл заргарлик буюмларини узоқ вақт кўриб, 49 миллион сўмлик тилла буюмларни танлаган. У сотиб олиш истагини билдириб қўлига олган ва ўғлига бергани. Ўғли эса дарҳол номаълум томонга қочиб чиқиб кетгани ҳақида маълум қилган.

Дастлабки суриштирувлар натижасида ушбу аёл Қўқон шаҳрида яшовчи 49 ёшли Х.Г., ёнидаги ўсмир эса унинг 12 ёшли ўғли И.А. экани аниқланган.

Олиб борилган ҳамкорликдаги тезкор тадбирлар натижасида Миллий гвардия ходимлари томонидан воқеа жойидан қочиб кетган вояга етмаган бола қўлга олиниб, қимматбаҳо буюмлар ўрнатилган тартибда ўз эгасига қайтарилган.

Ҳозирда ички ишлар органлари томонидан суриштирув ишлари давом эттирилмоқда.