Тошкентда 43 ёшли эркак танишини уриб ўлдириб қўйди. Bugun.uz’даги маълумотларга кўра, воқеа 2023 йилнинг 28 июн куни, Қурбон ҳайити байрамида содир бўлган. Асли наманганлик 43 ёшли Бекзод. А. шу куни байрамни нишонлаш мақсадида таниши Мухтор.К.нинг иш жойига (тош майдалаш цехи) борган. У йўлда ўзи билан олиб келган спиртли ичимликни Мухтор.К. билан бирга ичиб, овқатланиб бўлгач, ухлаб қолган.

Бекзод.А.нинг сўзларига кўра, у ухлаб ётган пайтда Мухтор.К. темир чойнак билан бошига урган. Уйғониб, нега бундай қилганини сўраганда эса сўкинганлигини айтиб, уни урмоқчи бўлган. Бекзод.А. эса тушида сўкинган бўлиши мумкинлигини тушунтириб, ўзини ҳимоя қилишга уринган. Шундан сўнг, у Мухтор.К.ни босиб олиб, бир неча маротаба қаттиқ урган ва кейин жойига ётиб ухлаган. Тонгда туриб, шеригини уйғотмоқчи бўлганида эса унинг вафот этганини тушунган.

Сўнгра, хотинига қўнғироқ қилиб, воқеани сўзлаб берган. Хотини унга милицияга ўзини топширишни маслаҳат берган.

2023 йилнинг 4 октябр куни ҳолат юзасидан бўлиб ўтган судда айбланувчининг хотини 2022 йилдан буён эри билан яшамаслиги, бунга ҳам унинг спиртли ичимликларга ружу қўйгани ва маст ҳолда кўп жанжал қилиши сабаб бўлганини айтган.

Суд Бекзод.А.ни Жиноят кодексининг 97-моддаси (қасддан одам ўлдириш) билан айбли деб топиб, 10 йилга озодликдан маҳрум қилиш жазосига ҳукм қилган.