Дональд Трамп АҚШда ўтказиладиган кейинги президентлик сайловларида ғалаба қозонса, ҳарбий можарони ҳал этиш учун Владимир Путин ҳамда Владимир Зеленскийга қўнғироқ қилади. Бу ҳақда Американинг собиқ президенти Флоридада ўз тарафдолари олдидаги чиқиши давомида маълум қилди, деб хабар беради RSBN телеканали.

«Ғалабам аниқ бўлган кечадаёқ икки инсонга қўнғироқ қиламан: Путин ва Зеленскийга. Мен уларга ‘Учрашишимиз керакʼ дейман. Бу масалани ҳал эта олишимга кафолат бераман… Биз 24 соат ичида битим имзолаймиз», — деган Трамп.

Собиқ президент агарда АҚШ етакчиси лавозимини сақлаб қолганида Россия ҳарбий операцияни бошламаган бўлиши ҳақидаги иддаосини қайтарган. Шунингдек, у Украинага кўрсатилаётган ёрдамлар учун маблағ сарфлашни тўхтатишга чақирган. «Миллиардлаб, юз миллиардлаб долларни ҳавога учириш керак эмас», — деган Трамп. Унинг ҳисоблашича, АҚШнинг қўллаб-қувватлови можаронинг узоқ давом этишига сабаб бўлмоқда.

Трамп ўз номзодини президентлик лавозимига илгари суриб бўлган. У олдин ҳам бир неча бор Украинадаги уруш ҳақида гапириб, амалдаги президент Жо Байденнинг ҳаракатларини танқид қилган ва қарама-қарши баёнотлар берганди.

Аввалроқ Трамп 2024 йилги президентлик сайловларида қатнашиш учун ариза бергани, Трамп сайловда қатнашишига тўсқинлик қиладиган ягона сабабни айтгани ҳақида хабар берилганди. Шунингдек, декабрь охирларида Вакиллар палатасининг 2021 йили Капитолийга қилинган ҳужумни тергов қилаётган қўмитаси ўзининг якуний ҳисоботини эълон қилган ва Трампга давлат лавозимларида ишлашни тақиқлашини билдирганди.

Эслатиб ўтамиз, Трамп тарафдорлари 2021 йил 6 январда Капитолийга бостириб кирганди. Оқибатда беш киши, жумладан, бир полициячи ҳалок бўлган. АҚШ президенти Жо Байден буни қуролли қўзғолон деб атаган.