Бугун, 23 октябр куни Президент Шавкат Мирзиёев USAID администратори Саманта Пауэр бошчилигидаги делегацияни қабул қилди. Бу ҳақда Президент матбуот хизмати хабар берди.

Унда шу йилнинг сентябр ойида Ню-Йорк шаҳрида БМТ Бош Ассамблеяси сессияси доирасида бўлиб ўтган «С5+1» форматидаги давлат раҳбарлари саммитида эришилган келишувларни амалга ошириш юзасидан фикр алмашилган.

Шунингдек, USAID администратори Саманта Пауер Ўзбекистон халқини қўллаб-қувватлаш учун 14 миллион доллардан ортиқ маблағ ажратилишини эълон қилган.

Ушбу маблағлар сил касаллиги, эпидемия ва пандемия таҳдидига қарши кураш, шунингдек, хусусий секторни мустаҳкамлашга йўналтирилиши таъкидланган.

Маълумот учун, ушбу делегация Марказий Осиё мамлакатлари ва АҚШнинг вазирлар даражасидаги тараққиёт масалалари бўйича учрашувида иштирок этиш учун Ўзбекистонда бўлиб турибди.