Шавкат Мирзиёев 22 сентябрь, пайшанба куни Тошкент вилоятининг Нурафшон шаҳрига ташриф буюриши тўғрисида хабар берилганди. Айни пайтда сессия бошланган ва унда давлат раҳбари Шавкат Мирзиёев нутқ сўзламоқда.

«Агар мендан президент бўлиб, тайёрлаган кадрларингизни кўрсатинг дейилса, улардан бири сифатида Зойир Мирзаевни кўрсатган бўлардим. У жуда оғир шароитларда, мураккаб вазиятдаги вилоятларда ишлади. Зойир Мирзаев жуда кўп жойда керак. Лекин мен уни Тошкент вилоятига олиб келдим. Мен Тошкент вилояти ҳокимлигига Зойир Мирзаев номзодини таклиф қилар эканман, ҳозир ҳам шу вазифани бажара оладиган номзод бўлса кўриб чиқишга тайёрман.

Зойир Мирзаевни Тошкент вилоятига олиб келаётганимда айтганман – ‘сен ҳали Қашқадарё вилоятини оғир дейсан, Тошкент вилоятидаги вазият икки карра оғирʼ. Пойтахтнинг ёнгинаси бўлган Чиноз туманида ичимлик суви муаммо.

Шунинг учун бугун мен баландпарвоз нутқларни четга суриб, ҳокимликка номзоднинг таклифларини эшитсак, унинг муаммоларини ечиш устида ишласак», — дея Президент сўзларидан иқтибос келтирмоқда «Kun.uz».

Эслатиб ўтамиз, 2021 йилнинг ноябрида Қашқадарё вилояти собиқ ҳокими Зойир Мирзаев 18 ноябрь куни Тошкент вилояти ҳокими вазифасини бажарувчи этиб тайинланганди.