Ўзбекистонда 2023 йил 25 сентябр куни Вазирлар Маҳкамасининг қарори билан «Диний бағрикенглик» кўкрак нишони тўғрисидаги низом тасдиқланди.

Кўкрак нишони билан атоқли давлат ва жамоат арбоблари, диний-ижтимоий соҳадаги раҳбарлар ва етук уламолар, давлат ташкилотлари ва нодавлат нотижорат ташкилотлар ходимлари, халқаро ташкилотлар, дипломатик ваколатхоналарнинг вакиллари, хорижий арбоблар ва олимлар тақдирланади.

Шунингдек, чет эл фуқаролари ва фуқаролиги бўлмаган шахслар ҳам кўкрак нишон билан тақдирланиши мумкин.

Кўкрак нишони ҳар йили 16 ноябр – Халқаро бағрикенглик куни арафасида тантанали тарзда топширилади. Бундан ташқари, кўкрак нишони билан тақдирланганларга БҲМнинг 4 баравари (1 миллион 320 минг сўм) миқдорида бир йўла тўланадиган пул мукофоти берилади.

Эслатиб ўтамиз, аввалроқ Ўзбекистонда «Сейсмик хавфсизлик соҳаси аълочиси» кўкрак нишони таъсис этилганди.