Сенатнинг 48-ялпи мажлисида кўп квартирали уйлар ва аҳоли гавжум бўладиган объектларда фойдаланиладиган лифтлар билан боғлиқ муаммолар Вазирлар Маҳкамаси томонидан ўрганиб чиқилгани маълум қилинди.

Сенат матбуот хизмати хабар беришича, кўп квартирали уйларда, айниқса, янгидан қурилиб фойдаланишга топширилаётган кўп квартирали уйларда фойдаланиладиган лифтларнинг маънан ва техник эскирганлиги, тегишли давлат стандартлари ва хавфсизлик талабларига мувофиқ эмаслиги, шунингдек уларни соз ҳолатда сақлаб турилиши устидан назорат етарли эмаслиги аниқланган.

Бу каби масалаларни ҳал этиш мақсадида 2023 йил 15 ноябр куни қабул қилинган Вазирлар Маҳкамасининг 602-сон қарорига мувофиқ 2024 йил 1 мартидан бошлаб кўп квартирали уйларда лифт ва эскалатордан фойдаланиш билан боғлиқ камчиликлар аниқ чоралар асосида бартараф этилади.

Шунингдек, Сенатнинг Мудофаа ва хавфсизлик масалалари қўмитаси раиси Қутбитдин Бурхонов Uzbekistan Airways АЖга қарашли чипта сотиш кассалари фаолиятида бюрократик усуллар ҳамон сақланиб қолаётгани, фуқаролар томонидан ўз яқинлари учун чипта сотиб олиш жараёнида улардан фуқаролик паспортининг асл нусхаси талаб этилаётгани, асл нусхаси тақдим этилмаганда эса чипта сотилмаётганлиги билан боғлиқ масалага тўхталган. Чипталар савдоси билан боғлиқ бундай камчиликлар, қонунбузарликларга чек қўйиш бўйича таъсирчан чоралар кўрилганини ва бу чоралар ижроси қатъий назоратга олингани айтиб ўтилган.

Эслатиб ўтамиз, шу йилнинг 24 июлида Мирзо Улуғбек туманида Паркент кўчасидаги уйда 32 ёшли аёл лифт ишламай қолиши оқибатида қамалиб қолганди. У бинога одамлар тўлиқ кўчиб келмагани сабабли 3 кун давомида қолиб кетгани ва оқибатда вафот этгани хабар қилинганди.