9:39 | 24.11.23
Зеленский Ўзбекистоннинг икки фуқароси ва компанияларига 10 йиллик санкция жорий этди
Шунингдек, мазкур санкциялар пакети Россия Федерацияси ва бошқа мамлакатлардан 300 дан ортиқ компания ва жисмоний шахсларга нисбатан қўлланилган.
Украина Президенти Володимир Зеленский 23 ноябр куни қатор россияликлар ва Россия компанияларига нисбатан иқтисодий санкциялар қўллаш ҳақидаги қарорини кучга киритди, деб ёзмоқда Украинанинг «Epravda» нашри. Келтирилган рўйхатда Ўзбекистоннинг икки фуқароси ва икки компанияси ҳам бор.
Қарор асосида Россия Федерацияси, Кипр, Швейцария, Буюк Британия, Ўзбекистон ва Беларус фуқароларига нисбатан 10 йил муддатга санкциялар, шунингдек, БАА, Россия, Ўзбекистон, Кипр, Туркия, Хитой ва Малтанинг қатор компанияларига нисбатан ҳам 10 йилга санкциялар қўлланилган.
Ўзбекистоннинг Akkermann Cement CA (Оҳангарон), «Оҳангаронцемент» АЖ каби корхоналарига ҳамда Нарзиева Наргиза Эркиновна, Носирхўжаев Шоҳрух Олимжоновичга нисбатан санкциялар белгиланган.
Санкциялар активларни блокировка қилиш, савдо операцияларини чеклаш ва капитални Украинадан ташқарига олиб чиқишнинг олдини олишни назарда тутади.
Мавзуга доир хабарлар билан танишинг:
