Давлат хавфсизлик хизмати ходимлари томонидан Сирдарё вилояти Давлат солиқ бошқармаси бошлиғи ўринбосари маҳаллий масъулияти чекланган жамият вакилидан муқаддам пора сифатида олган 14,500 доллардан 5 минг долларни қайтариб бераётган вақтида қўлга олинди.

Аниқланишича, 2021 йилда прокуратура органлари томонидан мазкур масъулияти чекланган жамият мансабдор шахсларига нисбатан қўзғатилган жиноят иши доирасида МЧЖнинг молиявий-хўжалик фаолияти бўйича солиқ идоралари ҳужжатли тафтиш ўтказган.

Ўша даврда вилоят Давлат солиқ бошқармасида бош инспектор бўлиб ишлаган мазкур мансабдор шахс аниқланган 900 миллион сўмга яқин молиявий хато ва камчиликлар бўйича белгиланиши лозим бўлган 300 миллион сўмлик жарима миқдорини 72 миллион сўмга камайтириб бериш эвазига 14,500 доллари миқдорида пора олган.

Ҳозирда унга нисбатан ДХХ Тергов бошқармаси томонидан Жиноят Кодексининг 210-моддаси (пора олиш) билан жиноят иши қўзғатилиб, қамоқ эҳтиёт чораси қўлланилган.

Фарғона вилоятидаги туманлардан бирининг Мудофаа ишлари бўлими бошлиғи эса 1998 йилда туғилган фуқарони вилоятдаги ҳарбий қисмлардан бирининг оркестрига танишлари орқали ишга киритиб қўйиш эвазига 2 минг АҚШ доллари олган вақтида ДХХ ва ИЖҚК Департаментининг ҳудудий бошқармалари ходимлари томонидан ушланган.

Ҳозирда мазкур мансабдор шахсга нисбатан Жиноят кодексининг 168-моддаси (фирибгарлик) билан жиноят иши қўзғатилган.

Аввалроқ Давлат хавфсизлик хизмати Самарқанд вилояти Иштиҳон тумани давлат хизматлари маркази ходимини пора билан ушлаганди.  Шунингдек, ДХХ Оҳангарон тумани ҳокимлиги ходимини 20 минг доллар пора билан ушлагани хабар қилинганди.