Фарғона шаҳрида 28 январь куни «Тrailblazer» билан тўқнашган «Spark»да ёнғин чиқди. Бу ҳақда вилоят Йўл ҳаракати хавфсизлиги бошқармаси ахборот хизмати хабар берди.

Маълум қилинишича, соат 23:05 да Фарғона шаҳри С.Темур кўчасида 1991 йилда туғилган Р.А. «Тrailblazer»ни бошқариб кетаётиб, қарама-қарши йўналишда ҳаракатланиб келаётган 1996 йилда туғилган С.А. бошқарувидаги «Spark» билан тўқнашган.

Оқибатда «Spark» автомобилининг олд қисмида ёнғин келиб чиққан. Ҳайдовчи С.А. чап оёқ болдир суягининг ёпиқ синиши ташхиси билан Фарғона шаҳар шифохонасига ётқизилган. Ёнғин ўт ўчирувчилар томонидан бартараф этилган.

Мазкур ҳолат юзасидан Фарғона шаҳар ИИО ФМБ ҳузуридаги тергов бўлими ҳамда ФВБ ходимлари томонидан текширув ўтказилмоқда.

«Барча ҳайдовчилардан йўл қоидаларига риоя қилишларини, ўзи ва атрофдагилар саломатлигини хавф остига қўймасликларини сўраймиз», дейилади хабарда.

Аввалроқ Навоийда «Cobalt» билан тўқнашган «Spark» ёниб кетгани ҳақида хабар берилганди. Шунингдек, Жиззахда «Nexia» қисқа туташув оқибатида ёниб кетган.