Германия канцлери Олаф Шольц 4 ноябрь куни бир кунлик ташриф билан Хитойга борди. Бу ҳақда The Associated Press хабар берди.

Маълум қилинишича, Германиянинг бир қанча йирик бизнес раҳбарлари билан сафар қилган Шольц Пекин марказидаги Халқ мажлислари залида яқинда ҳукмрон Коммунистик партия раҳбари этиб қайта тайинланган Си Цзиньпин томонидан расмий кутиб олинган.

Си Цзиньпин икки томон совуқ уруш давридаги кескин рақобатга қарамасдан бугунги кундаги ҳамкорликнинг асосий қисми бўлган иқтисодий алмашинув ҳамда дипломатик алоқалар 50 йилдан ортиқ вақт мобайнида давом этиб келаётганини таъкидлаган.

«Ҳозирги халқаро вазият мураккаб ва ўзгарувчан. Нуфузли кучлар сифатида Хитой ва Германия дунё тинчлиги ва тараққиётига кўпроқ ҳисса қўшиш учун ўзгаришлар ва тартибсизликлар даврида бирга ҳаракат қилиши керак», — дея Си Цзиньпиннинг нутқидан иқтибос келтиради CCTV давлат телерадиокомпанияси.

DPA немис ахборот агентлигига кўра, Олаф Шольц кириш нутқида «Биз катта кескинлик даврида биргамиз. Айниқса, мен Россиянинг Украинага қарши урушини таъкидламоқчиман. Бу бизнинг қоидаларга асосланган дунё тартибимиз учун кўп муаммоларни келтириб чиқаради», дея таъкидлаган.

Шольц, шунингдек, глобал очлик, иқлим ўзгариши ва жаҳонда қарз миқдорининг ошиб боришини «муҳим муаммолар» сифатида кўрсатган.

Олаф Шольцнинг яқинда учинчи беш йиллик муддатга партия раҳбарлигига сайланган 69 ёшли Си Цзиньпин билан учрашиши турли қарама-қарши фикрларни келтириб чиқармоқда.

Ташриф, шунингдек, Тайвань билан боғлиқ кескинлик кучайиб бораётган ва БМТ ҳисоботига кўра, Хитойнинг Шинжондаги уйғурлар ва бошқа этник гуруҳларга нисбатан инсон ҳуқуқларини бузиши «инсониятга қарши жиноят» сифатида кўрилаётган пайтда амалга оширилди.

Сафарда Шольцга Германиянинг ўнга яқин етакчи бизнес раҳбарлари, жумладан, аксарияти Хитойда гуллаб-яшнаётган бизнес билан шуғулланувчи Volkswagen, BMW, BASF, Bayer ва Deutsche Bank бош директорлари ҳамроҳлик қилган. Шольц Пекинда компания вакиллари билан ҳам учрашган.

Германия канцлерининг Хитойга қилган сафари 11 соат давом этган. Шундан сўнг у ўтирган самолёт Хитойдаги ковид чекловлари сабаб дарҳол Жанубий Кореяга парвоз қилган.

Маълумот учун, Олаф Шольц 2019 йилда коронавирус пандемияси бошлангандан бери Хитой раҳбари билан учрашган илк катта еттиликка кирувчи давлат раҳбари бўлди. Германия расмийлари бу ташриф Хитойнинг «қаерга қараб кетаётгани» ва ҳамкорликнинг қандай шакллари эҳтимоллилигини ўрганиш учун амалга оширилганини айтмоқда.

Шунингдек, бу ташриф Хитойни Россия иттифоқчиси сифатида Украинадаги урушни тугатишга ёрдам бериш ва ядровий риторикасини юмшатиш учун Москвага «босим ўтказиш»га кўндириш мақсадида бўлгани талқин қилнмоқда.

Эслатиб ўтамиз, аввалроқ Олаф Шольц ва Шавкат Мирзиёев учрашиши мумкинлиги ҳақида хабар берилганди. Шунингдек, Германия канцлери Путинни Украина ҳудудидан қўшинларини бутунлай олиб чиқиб кетишга чақирганди.