Шавкат Мирзиёев ҳамда Олаф Шольцнинг учрашиш масаласи ишлаб чиқилмоқда. Бу ҳақда Ўзбекистон ташқи ишлар вазири Владимир Норов Германия ТИВ раҳбари Анналена Бербок билан учрашув якунларига бағишланган брифингда маълум қилди.

Ўзбекистон Ташқи ишлар вазири Владимир Норов Германия ташқи ишлар вазири Анналена Бербок билан ўзаро суҳбат чоғида Ўзбекистон-Германия кун тартибининг ҳамда кўп томонлама тузилмалар доирасидаги ҳамкорликнинг долзарб масалаларини кўриб чиқди. Германия томонига асосий устувор йўналиши Марказий Осиё этиб белгиланган Ўзбекистон ташқи сиёсатининг асосий жиҳатлари ва эришилган натижалари тўғрисида маълумот берилди.

Шунингдек, олий ва юқори даражадаги сиёсий мулоқотни янада ривожлантириш, ташриф ва тажриба алмашиш амалиётини давом эттириш, турли йўналишларда қўшма тадбирлар ташкил этишдан икки томон ҳам бирдек манфаатдор эканлиги маълум қилинди. Шу билан бирга, айрим халқаро ва минтақавий муаммолар, жумладан, Афғонистондаги мавжуд вазият юзасидан фикр алмашилди.

Ташқи ишлар вазири Владимир Норов оммавий ахборот воситалари вакиллари учун матбуот анжуманида музокаралар чоғида ўзаро манфаатли кўп қиррали ҳамкорликка оид барча масалаларни атрофлича муҳокама қилинганини таъкидлади.

Маълум қилинишича, Шавкат Мирзиёев ҳамда Олаф Шольцнинг учрашиш масаласи ишлаб чиқилмоқда.

«Биз олий даражадаги мулоқотни янада ривожлантириш ва Германия Федератив Республикасининг амалдаги канцлери Олаф Шольц билан учрашув ташкил этиш масалаларини ишлаб чиқишдан манфаатдормиз», — деди Владимир Норов.

Аввалроқ Шавкат Мирзиёев Германия ташқи ишлар вазири Анналена Бербок билан учрашгани ҳақида хабар қилинганди.