Андижоннинг учта туманида аҳоли учун ажратилган кўмир мансабдорлар томонидан «туя қилинди»
Уч ҳолатда қиймати қарийб бир миллиард сўмга яқин бўлган кўмир сотиб юборилган.
Андижоннинг учта туманида мансабдорлар аҳоли учун имтиёзли нархда тарқатишга мўлжалланган кўмирни сотиб, шахсий эҳтиёжига ишлатиб юборди.
Вилоят прокуратурасининг маълум қилишича, Андижон туманида 362,3 миллион сўмлик 1 минг 220 тонна, Булоқбоши туманида 178,3 миллион сўмлик 445,5 тонна ва Жалақудуқ туманида 421,7 миллион сўмлик 1 минг 419,9 тонна кўмир омборхона мудирлари томонидан сотиб юборилган ва шахсий эҳтиёжи йўлида талон-торож қилинган. Кўмирни эса фуқароларга тарқатилди, дея сохта ҳужжатлар расмийлаштирилган.
Ҳолатлар юзасидан учала туман омборхоналари мудирларига нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми «а» банди билан жиноят иши қўзғатилган.
Жиноят ишлари юзасидан дастлабки тергов ҳаракатлари вилоят прокуратураси томонидан олиб борилмоқда.
Эслатиб ўтамиз, аввалроқ Фарғонада аҳоли учун ажратилган кўмир талон-торож қилинганди.
