АҚШ Россия ҳарбий-саноат комплексига таъсир кўрсатувчи янги санкцияларни жорий этишни режалаштирмоқда. Бу ҳақда мамлакат молия вазири Жэнет Йелленга таяниб Reuters хабар берди.

Қайд этилишича, сакциялар рўйхатидан Россия ҳарбий-саноат комплексига технологияларни харид қилиш билан шуғулланувчи, шунингдек, молиявий ўртакашлардан иборат 14 та жисмоний ва 28 та юридик шахс ўрин олади. Шу билан бирга, ушбу шахслар қаерда жойлашганига аниқлик киритилмаган.

«Бу Россия ҳарбий саъй-ҳаракатларига путур етказиш ҳамда уни санкциялар ва экспорт назорати чоралари орқали зарур жиҳозлардан маҳрум қилишга қаратилган кенг кўламли ҳаракатларимизнинг бир қисмидир», — дейди Йеллен.

Эслатиб ўтамиз, аввалроқ ЕИ Россияга дрон сотгани учун Эронга янги санкциялар қўллагани, Евроиттифоқ Россияга қарши саккизинчи санкциялар пакетини тасдиқлагани, Австралия Россияга қарши санкциялар рўйхатини кенгайтиргани тўғрисида хабар берилганди. Шунингдек, Канада Россияга нисбатан санкциялар жорий қилганди.

Шунингдек, Янги Зеландия Россияга қарши санкциялар рўйхатини кенгайтирган, Украина Мудофаа вазирлиги вакили Ўзбекистонни Россияга санкцияларни четлаб ўтишда ёрдам беришда айблаган эди.