Хайрли кеч, ушбу ўқиб турганингиз — «Бугун»нинг энг сара ва муҳим хабарлари жой олган «Бугун оқшоми» дайжести.

Ўзбекистонда вакцина олувчилар қамрови кенгаймоқда. Энди 12 ёшдан катта болалар ҳам коронавирусга қарши «Pfizer» билан ихтиёрий эмланади.

Коронавирусга қарши «Pfizer» вакцинасининг 12–15 ёшдаги болаларда ўтказилган клиник синов натижалари мазкур вакцинанинг юқори даражада самарадорлиги ва хавфсизлигини кўрсатган. Жаҳон соғлиқни сақлаш ташкилоти томонидан 12 ёшдан юқори болаларни ва ўсмирларни «Pfizer» вакцинаси билан эмлаш тавсия этилди. Шундан келиб чиқиб, Бош давлат санитария врачи ва миллий техник иммунологик эксперт комиссиясининг қарорига асосан, эндиликда Ўзбекистонда ҳам мазкур тоифадагиларда ҳам эмланиш имконияти мавжуд.

«UzAuto Motors»дан хабарлар: «Chevrolet Captiva»нинг янгиланган модели нархлари эълон қилинди, «Onix» ва «Tracker» ишлаб чиқариш учун 427 миллион доллар пул маблағи ажратилади.

«UzAuto Motors» 28 сентябрь куни «Chevrolet Captiva»нинг янгиланган модели нархларини эълон қилди. Автомобиль бошланғич LТ , LТ 5, LТ 7 ва Premier комплектацияларида тақдим этилади. Янгиланган «Chevrolet Captiva» 2022 автомобилини харид қилиш учун шартномани компаниянинг расмий дилерларида тузиш мумкин.

«Chevrolet Captiva» 2022 йил модели:

• бошланғич LТ комплектация: 192 775 000 сўм;
• LТ комплектация 5 ўринли : 238 086 957 сўм;
• LТ комплектация 7 ўринли: 244 782 609 сўм;
• Premier комплектация 7 ўринли: 269 478 261 сўм.

«Chevrolet Captiva»нинг «2022 эдишн»ининг техник хусусиятлари билан ушбу манзилда танишиб чиқишингиз мумкин. 

Ўзбекистонда «Onix» ва «Tracker» ишлаб чиқариш учун 427 миллион доллар пул маблағи ажратилади. «Газета.uz»нинг маълум қилишича, «Ўзавтосаноат» «UzAuto Motors» заводи базасида «Onix» ва «Tracker» автомобилларини ишлаб чиқариш учун 427,7 миллион доллар йўналтиришни режалаштирган. Таъкидланишича, лойиҳа 2022 йил сентябрь ойида йўлга қўйилади ва қуввати йилига 190 минг автомобилга тенг бўлади.

Шунингдек, «UzAuto Motors Powertrain» заводида янги автомобиль моделлари учун йилига 185 мингта двигатель ишлаб чиқаришни йўлга қўйиш мўлжалланган. Ишлаб чиқаришни ташкил этиш учун 2020−2023 йилларда 190,8 миллион доллар ажратилади.

Автомобиль мавзусида яна бир шингил: 2021 йилнинг январь–август ойларида мамлакатга 9 та хорижий давлатдан қиймати 9,2 миллион долларга тенг бўлган 501 та электромобиль импорт қилинган. Ўтган саккиз ой давомида электромобиллар асосан Хитой (443 та), Туркия (24 та) ва Литвадан (13 та) импорт қилинган.

АҚШ давлат котиби ўринбосари Венди Шерман Ўзбекистонга келади. Маълум қилинишича, давлат котиби ўринбосари Ўзбекистонга келгач, 4 октябрь куни юқори лавозимли амалдорлар ва фуқаролик жамияти вакиллари билан учрашади.

Венди Шерман Тошкентдан сўнг 6 октябрь куни Ҳиндистоннинг Нью-Деҳли шаҳрида бўлиб, бир қатор икки томонлама учрашувлар ўтказади. 7–8 октябрь кунлари эса Покистоннинг Исломобод шаҳрига бориб, юқори мартабали расмийлар билан кўришади.

Тошкент метросида янги поезднинг эшиклари очилмай қолгани айтилди. Аммо бу режа асосида бўлган. Тошкент метрополитенида 28 сентябрь куни «Буюк ипак йўли» бекатида поезд эшиклари очилмай қолгани акс этган видео тарқалди. «Тошкент метрополитени» унитар корхонаси хабар юзасидан «Bugun.uz»га изоҳ берди.

Маълум қилинишича, ҳаракат таркиби режали манёвр ишлари амалга оширилаётгани сабабли жадвал асосида «Буюк ипак йўли» бекатидан «Олмазор» электродепосига жўнатилиши лозим бўлган. Шунинг учун поезд йўловчиларсиз ҳаракатланган. Метрополитен маъмурияти йўловчилардан турли асоссиз хабарлар тарқатмасликни сўраган.

«Bugun.uz» колумнисти Ҳабибулло Мўйдинов метрополитен фаолиятига атаб карикатура чизди.

Хўш, оламда нима гап?

Афғонистоннинг янги мудофаа вазири Мавлавий Ёқуб «Толибон» ҳаракати жангчиларига селфига тушиш ҳамда оқ кроссовка кийишни тақиқлади. Мудофаа вазирининг айтишича, селфи «Толибон» ҳаракати расмийларининг хавфсизлигига таҳдид солади ва «шаҳидлар қони эвазига олинган» мақомига путур етказади. Оқ кроссовка эса Ғарб модаси ҳисобланади.

«Бу қўғирчоқ тузумининг ҳарбий раҳбарлари ва қароқчиларининг хатти-ҳаракати. Агар биз ўзимизни шундай тутишда давом этсак, исломий тузумимизни йўқотамиз», — дея изоҳ берган Ёқуб янги тақиқларнинг жорий этилишига.

Таъкидланишича, бундай тақиқлар кўплаб ҳаракат жангчилари Кобул босиб олинганидан сўнг истироҳат боғларида оммавий суратга туша бошлаганидан кейин кучга кирган. Жангчиларнинг қўлида қурол билан суратга тушгани янги ҳукуматга ёқмаган.

Грузиянинг собиқ президенти Михаил Саакашвили ҳибсга олинади. Мамлакат бош вазири Ираклий Гарибашвили собиқ президент Михаил Саакашвили мамлакат ҳудудига қадам қўйган заҳоти ҳибсга олинишини айтди.

Маълум қилинишича, собиқ президент 2 октябрь куни маҳаллий сайловлар учун Грузияга қайтмоқчи.
«Саакашвили бизнинг еримизга, ҳудудимизга қадам босиши билан тезда ҳибсга олинади ва қамоққа ташланади. Бу жараёнга аралашган ҳар бир киши қонун доирасида энг қаттиқ тарзда жазоланади», — деган Гарибашвили.

Шунингдек, у Саакашвилининг мақсади ҳокимиятни қайта қўлга киритиш эканига ишонч билдирган ва ҳозирги вазият 2003 йилда собиқ президент ўз шериклари билан Грузияда «атиргул инқилоби»ни уюштириб, ҳокимиятни эгаллагани каби эмаслигини айтган.

Бугун билан яшанг. «Бугун»да қолинг.