FIFA Украина президенти Владимир Зеленскийнинг жаҳон чемпионатидаги сўнгги ўйин олдидан ўз хабарини эфирга узатиш ҳақидаги илтимосини рад этди. Бу ҳақда CNN хабар берди.

Маълум қилинишича, Украина президенти идораси FIFA’дан сўнгги ўйин бошланишидан олдин Қатардаги стадионда Владимир Зеленскийнинг хабарини эфирга узатишни сўраган. Президент идораси нутқнинг жонли варианти ёки аксинча ёзиб олинган шакли эфирга узатилиши ҳақида маълумот бермаган.

CNN хабарига кўра, Украина президенти идорасида FIFA’нинг салбий жавоби ҳайрат билан кутиб олинган. «Биз FIFA ўз майдонларидан яхши мақсадда фойдаланишни хоҳлайди деб ўйлагандик», деди CNN манбаси. Унинг сўзларига кўра, рад жавоби олинишига қарамай, FIFA билан музокаралар давом эттирилмоқда.

Қатарда бўлиб ўтадиган жаҳон чемпионати финал учрашуви 18 декабрь куни Аргентина ва Франция терма жамоалари ўртасида Лусаил стадионида ўтказилади. Ўйин Тошкент вақти билан соат 20:00 да бошланади.

Нашрнинг ёзишича, Зеленский Канн кинофестивали, Гремми мукофотининг тақдирлаш маросимидан тортиб «Йигирмалик гуруҳи» давлатларининг Индонезиядаги саммитигача ҳар бир йирик тадбирда видео орқали кўриниш бермоқда ва шу орқали Украинадаги урушга дунё эътиборини янада кўпроқ жалб қилишга интилмоқда.

Эслатиб ўтамиз, аввалроқ Владимир Зеленский Индонезиядаги G20 саммитида онлайн форматда иштирок этганди. Шунингдек, Буюк Британия бош вазири Риши Сунак Украинани қўллаб-қувватлашни давом эттиришга ваъда берган.