Украина президенти Владимир Зеленский 15-16 ноябрь кунлари Индонезиянинг Бали оролида бўлиб ўтадиган G20 саммитида онлайн-режимда иштирок этиб, нутқ сўзлайди.

Зеленский 3 ноябрь куни G20 саммитида Россия президенти Владимир Путин қатнашгудек бўлса, унда иштирок этишдан бош тортишини маълум қилганди.

«Индонезияда ‘Катта йигирмаликʼ гуруҳи саммити бўлиб ўтади ва унда бизнинг позициямиз маълум қилинади. Сешанба куни менинг чиқишим бор», — деган Зеленский.

Аввалроқ Путин Балига ташриф буюрмаслиги, унинг ўрнига Россия ташқи ишлар вазири Сергей Лавров бориши айтилганди. Индонезия ҳукуматининг қайд этилишича, Путин ҳам саммитда виртуал равишда қатнашиши мумкин. Россия президентининг матбуот котиби Дмитрий Песковнинг маълум қилишича, Кремль Путин G20 саммитига бориш-бормаслигини шу ҳафта эълон қилади.

G20 саммитида Путин ҳам, Зеленский ҳам таклиф этилган. Октябрь ойида Индонезия ҳукумати иккала президент ҳам ташриф буюришга рози бўлганини, бироқ «Украина ва Россия ўртасидаги уруш сабаб вазият чигал»лигини таъкидлаганди.