Ички ишлар вазирлиги “Қурол ва портловчи материаллар муомаласи соҳасида давлат хизматлари кўрсатилишини электрон тартибга ўтказилиши муносабати билан Ўзбекистон Республикаси Ҳукуматининг айрим ҳужжатларига ўзгартириш ва қўшимчалар киритиш тўғрисида”ги Вазирлар Маҳкамаси қарори лойиҳасини муҳокамага қўйди.

«Ўзбекистон Республикаси Ҳукуматининг иловага мувофиқ айрим қарорларига қуйидагиларни назарда тутувчи ўзгартириш ва қўшимчалар киритилсин:

фуқаровий ва хизмат қуроли ҳамда унинг ўқ-дорилари муомаласига доир лицензия ва рухсатномаларни;

• портловчи материалларни олиб кириш, сотиб олиш, сақлаш, шунингдек, автомобил ва темир йўл транспортида ташишга доир рухсатномаларни жисмоний ва юридик шахсларнинг мурожаатлари бўйича махсус электрон тизим орқали расмийлаштиришни жорий этиш;
• фуқаровий ва хизмат қуроли, унинг ўқ-дорилари ҳамда портловчи материалларнинг муомаласи соҳаларида лицензиялаш ва рухсат бериш тартиб-таомилларини “Лицензиялаш, рухсат бериш ва хабардор қилиш тартиб-таомиллари тўғрисида”ги Ўзбекистон Республикаси Қонунига мувофиқлаштириш.

2. Мазкур қарорнинг бажарилишини назорат қилиш Ўзбекистон Республикаси ички ишлар вазири П.Р. Бобожонов зиммасига юклансин», — дейилади лойиҳада.

Ҳужжат лойиҳаси билан киритилаётган қўшимчалардан бирига кўра, агар лицензияловчи орган лицензия бериш тўғрисидаги аризани кўриб чиқиш муддати давомида лицензия бериш ёки лицензия беришни рад этиш тўғрисида қарор қабул қилмаса, лицензия талабгори бу ҳақда лицензияловчи органни «Лицензия» АТ ёки ЕИДXP орқали электрон шаклда хабардор қилади. Бунда, лицензия «Лицензия» АТ ёки ЕИДXP орқали автоматик равишда расмийлаштирилади ва талабгор ушбу низомда назарда тутилган тартибда давлат божини тўлаганидан сўнг лицензияланадиган фаолиятни амалга ошириш ҳуқуқига эга бўлади.

Шунингдек, лицензия талабгорининг лицензияни олишни кутишга розилигини билдириши, унинг кейинчалик лицензияловчи органни хабардор этиш орқали фаолиятни амалга ошириш ҳуқуқини чекламайди.

Лойиҳанинг қабул қилиниши:

• ички ишлар органлари томонидан лицензия ва рухсат этиш хусусиятига эга ҳужжатларни бериш билан боғлиқ давлат хизматлари талабгор жисмоний ва юридик шахсларга фойдаланиш учун қулай бўлган, соддалаштирилган ҳолда кўрсатилишига, уларнинг ҳуқуқлари ва қонуний манфаатлари тўлиқ тарзда рўёбга чиқарилиши устидан назорат даражаси кучайтирилишига;
• лицензия ва рухсат бериш тартиб-таомиллари тўғрисидаги қонунчилик ҳужжатларини тизимлаштириш орқали улардан ўтишнинг ягона тартиби белгиланишига, норматив-ҳуқуқий ҳужжатларнинг, талаб этиладиган ахборот ва ҳужжатларнинг сони қисқартирилишига, бунинг натижасида ортиқча бюрократик тўсиқларнинг бартараф этилишига;
• тегишли давлат хизматларини кўрсатишда манфаатдор давлат органи ва ташкилотларининг ўзаро ҳамкорлик қилиш ва ахборот алмашинувини амалга ошириш механизми такомиллаштирилишига;
• тадбиркорларга доир мажбурий талабларни қисқартириш ҳамда лицензия ва рухсат этиш хусусиятига эга ҳужжатларни олиш тартиб-таомилларини соддалаштиришга хизмат қилади.