«Da Vinci Capital» фонди сармоядорлари Telegram асосчиси Павел Дуровга «ТОN Inc.» ҳамда «Telegram Inc.» компаниясига қарши даъво аризаси берилиши муукинлиги маълум қилинган хат (letter before claim) юборди. Бу ҳақда «Forbes» хабар берди.

Маълум қилинишича, февраль ойи охирида «Da Vinci Capital» адвокатлари Telegram асосчиси Павел Дуров, вице-президент Илья Перекопский ҳамда ТОN компаниясининг бошқа топ-менежерлари ва адвокатларига «ТОN Inc.» ҳамда «Telegram Inc.» компаниясига қарши даъво ариза берилиши мумкинлиги ҳақидаги огоҳлантириш хатини юборган.

«Forbes»нинг ёзишича, муваффақиятсизлик билан тугаган лойиҳа учун қарийб 100 миллион доллар миқдоридаги зарарни қоплаш талаби ёзилган ва бунинг учун икки ҳафта муҳлат берилган.

Маълумот ўрнида, ТON Telegram жамоаси томонидан ишлаб чиқилган блокчейн-платформа бўлиб, 2020 йилнинг май ойида Павел Дуров унинг Gram криптовалютаси билан бирга ёпилишини эълон қилган. Бироқ бу вақтгача ушбу лойиҳа дунё бўйлаб 171 инвестордан 1,7 миллиард доллар жалб қилишга муваффақ бўлган.

Аввалроқ Telegram бир қатор давлатларда ишламай қолгани хабар берилганди. Шунингдек, танланган инвесторлар орқали 1 миллиард доллар жалб қилиниши маълум қилинганди.