Американинг уруш тадқиқотлари институти (Institute for The Study of War) ўз таҳлилларида Украина президенти Володимир Зеленский Исроилнинг ҲАМАС билан уруши Украинага снарядлар етказиб беришга салбий таъсир кўрсатганлигидан ранжиганини ёзмоқда.

Зеленский Bloomberg’га берган интервюсида Исроил 155 миллиметр артиллерия снарядларини глобал миқёсда етказиб беришни талаб қилганини ва бу жуда муҳим пайтда Украинага ушбу турдаги снарядларни етказиб беришни секинлаштирганини айтган.

Институт шунингдек, Россия қўшинлари асосан Хмелницк вилоятига қаратилган 10 та «Шахед» 131/136 учувчисиз учиш аппаратларини ва Донецк йўналишида бир нечта C-300 ракеталарини учирганини хабар қилган.

Украина ҳарбий манбаларининг хабар беришича, мамлакатнинг ҳаво ҳужумидан мудофаа воситалари Николаев, Одесса, Житомир ва Хмелницк вилоятлари устида тўққизта «Шаҳед» учувчисиз учиш аппаратини уриб туширган.

Эслатиб ўтамиз, Володимир Зеленский урушда жонбозлик кўрсатаётган аскарларга ташаккур билдирганди. Шунингдек у, Пригожин Кремл буйруғи билан ўлдирилганлигини таъкидлаганди.