Шу йилнинг 29 октябр куни Россиянинг Доғистон Республикаси Махачқалъа шаҳридаги аэропортда тартибсизлик келиб чиқиб, бир гуруҳ оломон маҳаллий вақт билан соат 19:18 да Махачқалъага Тел-Авивдан учиб келган Red Wings авиакомпаниясига тегишли самолёт йўловчиларини шаҳарга қўймаслик мақсадида тартибсизлик чиқарганди. Аэропортда чиққан тартибсизликлар вақтида оломон асли ўзбекистонлик эркакни яҳудий, дея гумон қилиб, ушлаганди.

Bugun.uz воқеа «қаҳрамони» билан алоқага чиқиб, ҳолатга аниқлик киритганди. Унга кўра, яҳудий, дея гумон қилинган эркак асли ўзбекистонлик Мамадалиев Дилшод Маҳмудович бўлган. У аҳволи яхши эканини билдириб, воқеа ҳақида ҳикоя қилиб берганди.

Махачқалъадаги ушбу воқеалар фонида Telegram мессенжери асосчиси Павел Дуров зўравонликка ундовчи ҳар қандай Telegram-каналлар блокланишини айтган. У мисол тариқасида Махачқалъа шаҳридаги аэропортда юзага келган тартибсизликларнинг кучайишига даъват қилган Telegram-канални блоклаган.

«Зўравонликка чақирувчи ҳар қандай каналлар (юқоридаги скриншотда бўлгани каби) Telegram, Google, Apple ва бутун цивилизациялашган бутун дунё қоидаларини бузгани учун блокланади» дея ёзган Дуров ўз саҳифасида.

Дуров эълон қилган постига «Утро Дагестан» каналида чоп этилган антисемитистик постнинг скриншотини илова қилган.

Шунингдек, чет эл нашрлари «Утро Дагестан» канали Украинага жўнаб кетган Давлат Думасининг собиқ депутати Иля Пономарев томонидан очилганини ёзишган.

Тартибсизликлар фонида Пономарев каналга энди алоқаси йўқлигини айтган. Бироқ, бир неча ой олдин журналистлар билан суҳбатда Пономарев уни ўзиники деб атаган.