Аввалроқ Россиянинг Доғистон Республикаси Махачқалъа шаҳридаги аэропортда тартибсизлик келиб чиққани ҳақида хабар берилганди. Аэропортда чиққан тартибсизликлар вақтида оломон асли ўзбекистонлик эркакни «яҳудий», дея гумон қилиб, ушлади. Ижтимоий тармоқларда ғазабланган оломон бир эркакни Исроил фуқароси, деб ўйлаб, ўраб олгани акс этган видео тарқалди.

Видеода одамлар эркакнинг Россия фуқаролик паспортини тортиб олгани ва ундан Исроил паспортини кўрсатишини талаб қилаётганини кўриш мумкин. Эркак эса ўзининг ўзбек эканини исботлашга уринади. Bugun.uz воқеа «қаҳрамони» билан алоқага чиқиб, ҳолатга аниқлик киритди. Унга кўра, яҳудий, дея гумон қилинган эркак асли ўзбекистонлик Мамадалиев Дилшод Маҳмудович бўлган. У аҳволи яхши эканини билдириб, воқеа ҳақида ҳикоя қилиб берди.

«Ҳаммаси яхши, мен тирикман. Махачқалъа ҳуқуқни муҳофаза қилиш органларига раҳмат», – дейди у.

У, шунингдек, отаси Ўзбекистонлик экани, ўзи эса Россиянинг Смоленск шаҳрида туғилиб, ўсгани ҳақида айтди.

«Мен Ўзбекистонда фақат бир марта, болалигимда бўлганман. Шундан сўнг, асосий вақтимни тиббиётга бағишлаганман. Яқин орада албатта оилам билан Ўзбекистонга бормоқчиман», дейди Мамадалиев.

Маълумот учун, Дилшод Мамадалиев Смоленск давлат тиббиёт академиясини тамомлаган. Мутахассислиги бўйича юрак-қон томири жарроҳи бўлиб, тиббиёт фанлари бўйича фан номзоди ҳисобланади. Шунингдек, у тиббиёт соҳасида 15 йиллик тажрибага эга.

Эслатиб ўтамиз, ҳозирда Махачқалъа аэропортидаги тартибсизлик юзасидан Россия Жиноят кодексининг 212-моддаси билан жиноят иши қўзғатилган.