Қозоғистонда 20 ноябрь куни навбатдан ташқари президент сайловлари бошлангани ҳақида хабар берилганди. Овоз беришнинг дастлабки натижаларига кўра, мамлакатнинг амалдаги президенти Қосим-Жўмарт Тўқаев 82,45 фоиз овоз билан рақобатчиларидан илгарилаб кетди. Бу ҳақда «Nur.kz» хабар берди.

Маълум қилинишича, Тўқаев катта фарқ билан устунликка эришган. Ундан кейинги ўринни «Овул» Халқ демократик ватанпарварлик партиясидан номзод Жигули Дайрабаев эгаллаган.

Шунингдек, қизлари чет элга турмушга чиққан ота-оналарга солиқ солишни таклиф қилган «Профессионал ижтимоий ишчилар миллий альянси» республика жамоат бирлашмаси вакили Каракат Абден — 2,54 фоиз;

Қозоғистон касаба уюшмалари ҳамдўстлиги «Аманат» касаба уюшмалари республика бирлашмасидан Мейрам Кажикен — 2,23 фоиз;

Умуммиллий социал-демократик партиядан Нурлан Аусебаев — 2,17 фоиз

«Қазақ аналари — дастурге жол» республика жамоат бирлашмасидан Салтанат Турсунбекова — 2,08 фоиз овоз тўплашга муваффақ бўлган бўлса, 5,2 фоиз сайловчилар ҳеч кимга овоз бермасликни маъқул кўрган.

Эслатиб ўтамиз, Қозоғистонда бош вазир лавозимини бекор қилиш таклиф қилинганди. Аввалроқ Қозоғистонда биринчи синф ўқувчиларини планшетлар билан таъминлаш режалаштирилаётгани ҳақида хабар берилганди. Шунингдек, мамлакатда Элбоши куни давлат байрамлари рўйхатидан чиқарилиши мумкинлиги айтилганди.