Ўтган йилнинг август ойида Сурхондарёда 54 ёшли эркак ўзининг 33 йиллик турмуш ўртоғи билан келиб чиққан жанжал оқибатида уни ёниб турган тандирга ташлаб, вахшийларча қотиллик содир этган. Бироздан сўнг уйига келган усталар бадбўй ҳид қаердан келаётганини сўрашганида эса эски латталарни ёқиб юборганини айтган ва ўзи қизил пасспортини олиб уйдан чиқиб кетган.

Бир неча соатдан сўнг эса келини уйга келган ва у ҳам бадбўй ҳид қаердан келаётганини ва қайнонаси қаердалигини сўраган. Ҳолатдан шубҳаланган келин дарҳол тандирга югурган ва усталардан ёрдам сўраб, ИИБга хабар қилган. Шундан сўнг, чет элга чиқиб кетишга улгурмай қолган эр қўлга олинган.

Ҳолат юзасидан бўлиб ўтган суд мажлисида эр хотини у билан ажрашмоқчи эканини айтгач, жаҳли чиқиб кетганини қилмишидан пушаймон эканини билдирган.

Шунингдек, судда иштирок этган фарзандлар оталари доимий равишда маст ҳолатда жанжал қилиб келганини, уни асло кечирмасликларини билдирган.

Суд эркакни Жиноят кодексининг 97-моддасси (қасддан одам ўлдириш) билан айбдор деб топган ва унга нисбатан 19 йил муддатга озодликдан маҳрум қилиш жазосини тайинлаган. Шунингдек, жазонинг дастлабки 3 йилини турмада, қолган қисмини умумий тартибли колонияда ўташ белгиланган.

Эслатиб ўтамиз, аввалроқ Андижонда аёлини ўлдирмоқчи бўлган эркак янглишиб унинг синглисини пичоқлаб қўйгани хабар қилинганди. Эркакка нисбатан 18 йилга озодликдан маҳрум қилиш жазоси тайинланганди.