Bugun.uz‘даги мавжуд маълумотларга кўра, Андижонда шаръий никоҳидаги аёлини хиёнат қиляпти, деган фикр билан юрган эркак уни «қўлга тушириш» учун 3-4 кун давомида кузатиб юрган. Аммо режаси амалга ошмагач, уни ўлдиришга қасд қилган.

2023 йилнинг ёз кечасида эркак хотинини ўлдириш учун у яшаб келаётган уйга борган ва хонада ухлаб ётган аёлнинг оғзини беркитиб пичоқ билан кўксига урган. Аёл вафот этган. Ўша вақтда хонада бошқа бир аёл қўрқувдан бақириб юборган ва эркак унинг овозидан хотини эканини таниб, бошқа аёлни ўлдириб қўйганини пайқаган. У режасини охирига етказиш учун хотинини ҳам ўлдирмоқчи бўлиб пичоқ билан унинг ҳам дуч келган жойларини жароҳатлаган.

Аёл ўзини ҳимоялаш учун фаол қаршилик кўрсатган. Шу вақтда уйғониб кетган ўгли чироқни ёқиши билан эркак қочиб кетган ва ниятини амалга оширолмаган.

Мазкур ҳолат юзасидан бўлиб ўтган суд мажлисида эркак ўзи ўлдирмоқчи бўлган хотини билан 2009 йилда шаръий никоҳ асосида оила қурганини ва икки нафар фарзандлари борлигини айтиб ўтган. Шунингдек, бир қанча вақтдан буён алоҳида яшаб келаётган хотинининг хиёнат қилганини, шубҳага боргани учун қасд олмоқчи бўлганини билдирган. Унга кўра, ўша куни хонада ётган аёлни ўзининг хотини деб ўйлаб пичоқлаган.

Марҳуманинг эрига кўра, аёли опасининг соғлиғида муаммо бўлгани учун уникига нон ёпиб бериш мақсадида тез-тез ёрдамга келиб турган. Воқеа содир бўлган куни ҳам шундай бўлган.

Суд эркакни Жиноят кодексининг 97-моддаси (қасддан одам ўлдириш) ва 25- моддаси (Жиноятга тайёргарлик кўриш ва жиноят содир этишга суиқасд қилиш) моддалари билан айбли деб топган ва унга нисбатан жазоларни қисман қўшиш йўли билан 18 йил муддатга озодликдан маҳрум қилиш жазоси тайинланган.