7 январ куни соат 16:05 да Тошкент метросининг «Юнус Ражабий» бекатидан ҳаракатланиши лозим бўлган 63-сонли ҳаракат таркибида техник носозлик ҳолати кузатилган. Ҳолат бўйича «Тошкент метрополитени» матбуот хизмати муносабат билдирди.

Билдирилишича, машинист томонидан белгиланган йўриқномага асосан, йўловчилар ва ҳаракат хавфсизлигини таъминлаш мақсадида, поезддаги йўловчилар «Юнус Ражабий» бекатига туширилган ҳамда ҳаракат таркиби техник кўрикдан ўтказилиши учун текширув йўлаги томон олиб кетилган. Шундан сўнг, ортдан келган бошқа ҳаракат таркиби бекатдаги йўловчиларни манзилларига қадар олиб борган.

«Ҳозирги вақтда барча поездлар белгиланган жадвал асосида ҳаракатланмоқда», дейилади корхона хабарида.

Эслатиб ўтамиз, аввалроқ Тошкент метросида аёлнинг тоби қочиб, поезд йўлига йиқилиб тушгани видеоси тарқалган эди.