Тошкент шаҳрида яшовчи доимий аҳоли сони 3 миллиондан ошди. Бу ҳақда Статистика агентлиги матбуот хизмати хабар берди.

Қайд этилишича, 2023 йилнинг 1 октябр ҳолатига кўра, пойтахтда яшовчи доимий аҳоли сони 3 миллион 20,5 минг кишини ташкил этмоқда.

Шундан 1 миллион 481,9 минг киши (49,3 фоиз) эркаклар, 1 миллион 538,6 минг киши (50,7 фоиз) эса аёллар экани маълум қилинган.

Маълумот учун, Тошкент шаҳри аҳолиси сони илк марта 1960 йилда 1 миллион нафарга етган, 1985 йилда эса икки миллиондан ошган. Шунга кўра, шаҳарда аҳоли сони бир миллиондан икки миллионга етгунига қадар 25 йил вақт ўтган бўлса, уч миллионлик маррага етиш учун 38 йил кетган.