Ўзбекистоннинг янги тайинланган элчиси Абат Файзуллаев Италия президенти Сержо Маттареллага ишонч ёрлиқларини топширди. Бу ҳақда Dunyo ахборот агентлиги хабар берди.

Ушбу маросим Италия президентининг Рим шаҳридаги қароргоҳи – «Квиринале» саройида бўлиб ўтган.

Суҳбат жараёнида Сержо Маттарелла 2022 йилнинг 9-11 ноябр кунлари Ўзбекистонга амалга оширган расмий ташрифини ёдга олган.

Шунингдек, учрашувда икки мамлакат ўртасида стратегик мулоқотнинг аҳамиятига тўхталиб, Ўзбекистон ва Италиянинг сиёсий, савдо-иқтисодий ва маданий-гуманитар ҳамкорлигидан самарали фойдаланишдан манфаатдор эканлигини икки томон ҳам тасдиқлаган.

Абат Файзуллаев 2023 йилнинг октябр ойида Ўзбекистоннинг Италиядаги элчиси этиб тайинланди. У 2020-2023 йилларда Ўзбекистоннинг Австриядаги элчиси бўлиб ишлаган, шунингдек, Венгриядаги ўриндошлик асосида элчиси бўлган. Бир вақтнинг ўзида, Ўзбекистоннинг Европада хавфсизлик ва ҳамкорлик ташкилоти ҳамда Венадаги бошқа халқаро ташкилотлар ҳузуридаги доимий вакили лавозимида фаолият олиб борган.

Маълумот учун, Абат Файзуллаев 2018-2023 йилларда Ўзбекистоннинг Римдаги дипломатик ваколатхонасига раҳбарлик қилган Отабек Акбаров ўрнига тайинланган.

Аввалроқ, Президент Шавкат Мирзиёевнинг таклифига биноан 9 ноябр куни Италия президенти Сержо Маттарелла фарзанди Лаура Маттарелла ҳамроҳлигида расмий ташриф билан Ўзбекистонга келгани хабар қилинганди.